قربانی کا جانور بیمار ہے یا مرنے کا خوف ہے تو ذبح کر کے کھا سکتے ہیں یا نہیں؟ اگر مر جائے تو اس کا فدیہ کیا ہے؟

 ایسا بیمار جانور جس کی بیماری ظاہر ہو اس کی قربانی نا جائز ہے۔ فتاوی عالمگیری میں ہے:" لا تجوز المريضة البين مرضها "ا  ھ ملخصا ( ج ۵ ص ۲۹۷، باب في بيان نحل اقامة الواجب) اور اگر اندیشہ قوی ہے کہ مر جائے گا تو اسے ذبح کر کے کھا سکتے ہیں جب کہ مالک، غنی، مالک نصاب ہو کہ اس کے لیے خاص اسی جانور کی قربانی لازم نہیں ، جیسا کہ اعلیٰ حضرت محدث بریلوی رضی عنہ ربه القوی تحریر فرماتے ہیں : ” سائل جب کہ غنی مالک نصاب ہے تو بہ نیت قربانی بکر ا خریدنے سے خاص اسی کی قربانی اس پر لازم نہیں، ملخصا (فتاوی رضویہ ج ۸، ص ۳۹۳، کتاب الاضحية) 

یونہی اگر قربانی کا جانور مر گیا ہے۔ تو مذکورہ دونوں صورتوں میں اس پر دوسرے جانور کی قربانی واجب ہے۔ بشرطیکہ وہ غنی مالک نصاب ہو ورنہ فقیر پر دوسرے جانور کی قربانی واجب نہیں۔ 

درمختار  کتاب الاضحیۃ میں     ہے: لو ماتت فعلى الغنى غيرها لا الفقيرا ( ج ۹، ص ۴۷۱)  واللہ تعالیٰ اعلم

الجواب صحیح: محمد نظام الدین رضوی برکاتی
الجواب صحیح : محمد ابرار احمد امجدی برکاتی

كتبه : شمس الدین احمد علیمی

۲۷ / ذی القعده ۱۴۲۵ھ