چند لڑکے علاحدہ علاحدہ کماتے ہوں سب مالک نصاب ہیں تو سب پر قربانی واجب ہے

اگر زید خود اور اس کے تینوں لڑکے سب کے سب علاحدہ علاحدہ مالک نصاب ہوں تو سب پر اپنی اپنی طرف سے قربانی واجب ہے ، مثلاً تینوں لڑکے زید کو جو کچھ دیتے ہیں اسے خرچ ہونے کے بعد ایام قربانی میں زید کے پاس اتنا روپیہ جمع ہے جو چھپن روپیہ بھر چاندی کی قیمت کا ہے تو زید پر خود اپنی طرف سے بھی قربانی واجب ہے۔ اسی طرح زید کے تینوں لڑکے جو کچھ کماتے ہیں ان میں سے ضروری اخراجات کے بعد ایام قربانی میں بقدر نصاب پیسے ہوں تو ان پر بھی اپنی اپنی طرف سے قربانی واجب ہے۔ لڑکے جب ملازمت کر رہے ہیں اور ہر ایک کی آمد و خرچ علاحدہ علاحدہ ہے تو سب اپنی اپنی کمائی کے مالک ہیں۔ اور جب زید کو وہ ماہانہ نقد دیتے ہیں تو جتنا زید کو دیتے ہیں زید ان کا مالک ہے اب جب اس کے پاس ایام قربانی میں بقدر نصاب مال جمع ہو گا تو خود اس پر اپنی طرف سے قربانی واجب ہوگی۔ واللہ تعالی اعلم