قربانی کے جانور میں ذبح کے وقت ولدیت میں کس کا نام لکھا جائے؟

قربانی کی جو دعائیں مذکور ہیں ان کا پڑھنا مسنون ہے اگر نہ بھی پڑھی جائے تو قربانی ہو جائے گی قربانی صحیح ہونے کے لیے جو بات ضروری ہے وہ یہ ہے کہ جس کے نام سے قربانی ہو وہ قربانی کی نیت کرلے کہ فلاں جانور کی قربانی کی میں نے نیت کی مثلا اس بکری کی یا اس بھینس کے ساتویں حصے کی۔ قربانی کی نیت سے جانور خرید نا بھی نیت ، اس صورت میں مزید کسی نیت کی ضرورت نہیں، لیکن جانور کسی اور نے خریدا اور قربانی کسی اور کی طرف سے ہورہی ہے تو جس کے نام سے قربانی ہو اس کی نیت ضروری ہے اور بعد میں جو دعا پڑھی جاتی ہے یہ مسنون ہے۔ اگر عورت شادی شدہ ہے تو عورت کے ساتھ زوجہ فلاں لگائیں ورنہ ماں کا نام معلوم ہو تو ماں کا ور نہ باپ کا۔ اور اگر ماں باپ کا نام بھی معلوم نہیں تو حضرت آدم و حوا علیہما السلام میں سے جس کسی کا نام لیا جائے گا صحیح ہے۔ یہ ضروری نہیں کہ مرد کے لیے حضرت آدم کا نام لے اور عورت کے لیے حضرت حوا کا۔ واللہ تعالی اعلم۔

۲۹ / ذی الحجہ ۱۴۰۹ھ