نماز میں سرکار صلی اللہ علیہ و سلم کا خیال آنے اور میلا دو معراج کے بارے میں ایک سوال

الجواب بعون الملك الوهـــاب

میلاد شریف کرنے سے بے  شمار فائدے ہیں ، خدائے تعالیٰ کی حمد وثنا ہوتی ہے، نبی اکرم صلی اللہ علیہ وسلم  پر درود و سلام پڑھا جاتا ہے، اعمال خیر کی ترغیب دی جاتی ہے، برے کاموں سے نفرت دلائی جاتی ہے، حضور سید عالم صلی اللہ علیہ وسلم   کی سیرت طیبہ بیان کی جاتی ہے۔ غرض کہ میلاد شریف کی ایک ایک ادا میں بے شمار دینی و دنیاوی فائدے ہیں جن کا انکار وہی کر سکتا ہے جس کے دل میں ایمان و محبت رسول اللہ صلی اللہ علیہ وسلم  کی دولت نہ ہو۔
اسی طرح یہ کہنا کہ حضور صلی اللہ علیہ وسلم   کا خیال نماز میں آجانے سے نماز نہ ہوگی گمراہی اور بددینی ہے۔ ہم نماز میں اپنے نبی کریم صلی اللہ علیہ وسلم   کو سلام کرتے ہیں ”السَّلَامُ عَلَيْكَ أَيُّهَا النَّبِيُّ وَرَحْمَةُ اللَّهِ وَبَرَكَاتُهُ“   اور درود پاک پڑھتے ہیں۔ پھر یہ کہنا حضور کا خیال نماز میں آجانے سے نماز نہیں ہوتی کس قدر جہالت ہے۔ اس سے سوال کیا جائے کہ نماز میں ”السَّلَامُ عَلَيْكَ أَيُّهَا النَّبِيُّ وَرَحْمَةُ اللَّهِ وَبَرَكَاتُهُ“  پڑھتے ہو یا نہیں اگر نہیں پڑھتے تو نماز مکمل نہیں ہوتی اور اگر پڑھتے ہو تو نماز میں حضور کا خیال آیا یا نہیں۔

ایسے ہی حضور صلی اللہ علیہ وسلم کے معراج جسمانی کا انکار کرنا گمراہی ہے۔ ایسے ہی لوگوں کے بارے میں حدیث میں آیا ہے: ”ایاکم و ایاهم لایضلونکم ولا یفتنونکم“ (صحیح مسلم ،ج 1،ص 12،داراحیاء التراث العربی ،بیروت)  ان سے دور رہو ان کو اپنے سے دور رکھو کہ کہیں تمہیں گمراہ نہ کر دیں، کہیں وہ تمہیں فتنہ میں نہ ڈال دیں۔
اگر اس شخص نے یہ کلمات شنیعہ بر بنائے وہا بیت کہے ہیں تو اس پر تو بہ و تجدید ایمان اور اگر بیوی رکھتا ہے تو تجدید نکاح بھی ضروری ہے۔ ورنہ صرف تو بہ کرے اور اللہ کے رسول کی محبت دل میں پیدا کرے۔
اگر پیر صاحب نے اس وقت مرید سے نماز پڑھنے کو نہ کہا تو پیر صاحب پر کچھ گناہ نہیں۔ البتہ مرید کے بے نمازی رہنے سے راضی رہتے ہیں تو ایسے پیر سے مرید ہونا جائز نہیں وہ تو بہ کرے اور مریدوں کو نماز پڑھنے کی ہدایت کرے۔ فقط

والله اعلم باالصواب و رسوله صلى الله عليه وسلم