زنا سے ہوئے بچے کیا زانی کے وارث ہوں گے؟

نمبر 1: شادی شده عورت کو اغوا کر کے کوئی آدمی اپنے گھر نا جائز طریقہ سے آباد کر لے تو جو اولاد اس عورت مذکور کے بطن سے ہو گی شرعا یہ اولاد اس اغوا کرنےوالے کی قرار نہیں دی جائے گی، احکام شریعت میں ہے زنا کے پانی کے لئے شرع میں کوئی عزت نہیں تو بچے اولاد زانی نہیں ٹھہرسکتے ، اولاد اس کی قرار نہ پائی، ایک عمده نعمت ہے جسے قرآن عظیم نے لفظ ہبہ سے تعبیر کیا،  یَهَبُ لِمَنْ یَّشَآءُ الذُّكُوْرَۙ (۴۹)  زانی اپنے زنا کے باعث مستحق غضب و سزا ہے، نہ کہ مستحق ہبہ و عطا لہذا ارشاد ہوا،لِلْعَاهِرِ الْحَجَرُ^(۱) لہذا صورت مسئولہ میں شریعت کی رو سے وه اولاد جب کہ اغوا کرنے والے کی قرار نہ پائی تو اس عورت کی یہ اولا د اغوا کرنے والے کے ترکہ کی وارث نہ ہوگی ، والله تعالیٰ و رسولہ الا علیٰ اعلم ۔

نمبر 2 : شادی شده عورت کو اغوا کرنے والا شریعت کے خلاف گھر میں آباد کرنے والا مرد اور وه عورت دونوں شرعاً شدید ترین مجرم و گناہگار مستحق نار لائق غضب جبار و قہار ہیں ، ان پر لازم و ضروری ہے کہ فوراً ایک دوسرے سے جدا ہو جائیں، شریعت ایک لحظہ بھی ان کو اکٹھا رہنے کی اجازت نہیں دیتی، حد و تعزیر لگا نا شرعاً حکام کا کام ہے، لیکن اس زمانہ میں یہاں پر حدود شرعیہ لگانے کا کوئی انتظام نہیں ہے، لہذا تعزیر وحد کا جواب میں  لکھنا بے فائده ہے، والله تعالی اعلم۔

نمبر 3:  لوگوں کو چاہئے کہ اس آدمی کوسمجھائیں اور شریعت کے مطابق عورت رکھنے کو کہیں اگر مان جائے تو بہتر ورنہ اس سے میل جول سب تعلقات منقطع کر دیں یہاں  تک کہ وه آدمی اپنے اس فعل بد سے باز آ جائے ، اگر وه بے حیا آدمی اپنے اس فعل بد سے باز نہیں آتا لوگ اس حالت میں بھی اس سے میل جول کر رہے ہیں تو شرعا یہ  لوگ بھی مجرم و گناہگار ہیں، والله تعالی و رسولہ الاعلیٰ اعلم 

(۱) ↩صحيح البخاري - ت البغا – البخاري (٢ ‏/ ٧٢٤)