تحریک بوائے اسکاؤٹ میں مسلمان کا شریک ہونا کیسا؟

الحمد لله هداية الحق والصواب

مسلمان کا فرضِ اہم اصولِ اسلام کی پابندی ہے۔ اسی پر ہر فلاح و نجاح، ترقی و عزت موقوف ہے۔ مسلمانوں نے جو کچھ ترقیاں کیں اسلام ہی کے سایۂ عاطفت میں رہ کر کیں، اور جتنا اسلام کا ساتھ چھوڑا اسی قدر پستی میں گرتے گئے۔ قرآنِ مجید کا ارشادِ کریم ہے: ﴿وَأَنْتُمُ الْأَعْلَوْنَ إِنْ كُنْتُمْ مُؤْمِنِينَ﴾ ⁽¹⁾ مسلمان اگر اپنی ترقی چاہتے ہیں تو احکامِ اسلام کے پابند ہو جائیں، اور کفار کے پیرو نہ بنیں۔ مسلمان کیوں کر ترقی کر سکتا ہے؟ کافر ہمیشہ یہی چاہے گا کہ مسلمانوں کو فروغ ہو۔ قرآنِ عظیم فرماتا ہے:

﴿یَاْلُوْنَكُمْ خَبَالًا﴾ (ترجمہ کنزالایمان: وہ تمہاری برائی میں گئی نہیں کرتے۔) یعنی وہ تمہیں نقصان پہنچانے میں کوئی کسر نہیں چھوڑیں گے۔ ﴿وَدُّوْا مَا عَنِتُّمْ﴾ (آل عمران، الآیة: 118) (ترجمہ کنزالایمان: ان کی آرزو ہے جتنی ایذا تمہیں پہنچے۔) یعنی ان کی دلی آرزو یہ ہے کہ تم مشقت میں پڑو۔

ان تعلیمات کو پسِ پشت ڈال کر فرزندانِ اسلام نے جو مصیبتیں اٹھائیں، پھر اٹھانی پڑیں، وہ دنیا نے دیکھیں؛ مگر لیڈران اب بھی اسی لکیر کو پیٹتے ہیں اور مسلمانوں کو گمراہ کرنے سے باز نہیں آتے۔

بالجملہ جو تحریک اٹھائی جائے، اس میں سب سے پہلے اس امر کا لحاظ ضرور ہے کہ وہ اصولِ اسلام کے مخالف نہ ہو؛ کہ اگرچہ بظاہر اس میں بہت کچھ نفع نظر آتا ہو، مگر جب خلافِ مشروع ہے تو انجام ہمیشہ خراب ہوگا اور بجائے نفع، نقصان ہوگا۔ اسکاوٹ کے عہد میں یہ شرط ضرور ہونی چاہیے کہ جہاں تک اسلام اجازت دے گا (اسی حد تک اطاعت ہوگی)، کہ گناہ میں کسی کی اطاعت نہیں۔

«لَا طَاعَةَ لِلْمَخْلُوقِ فِي مَعْصِيَةِ الْخَالِقِ»

اس کے قوانین کا نمبر 1 قبیح ہے، مسلمان کو خدا ہی پر بھروسہ چاہیئے، نہ کہ اسکاؤٹ کی عزت پر ﴿وَ عَلَى اللّٰهِ فَلْیَتَوَكَّلِ الْمُتَوَكِّلُوْنَ۠﴾ (ابرٰهيم، الآیة : 12) ترجمہ کنزالایمان: اور بھروسہ کرنے والوں کو اللہ ہی پر بھروسہ چاہیے۔ نمبر 2 میں بھی وہی شرط چاہے۔ نمبر 3 میں بلا امتیازِ ملت اخوت قائم کی ہے، حالانکہ اخوت صرف مسلمانوں میں ہوگی، مومن و کافر میں اخوت کیسی؟ قرآنِ عظیم بصیغۂ حصر فرماتا ہے: ﴿إِنَّمَا الْمُؤْمِنُونَ إِخْوَةٌ﴾ (الحجرات، الآیة: 10) ترجمہ کنزالایمان: مسلمان مسلمان بھائی ہیں۔ قواعدِ اسکاؤٹ میں ان امور کی ترمیم کی طرف ضرور لحاظ چاہیے کہ یہ باتیں خلافِ شرع ہیں۔ دوسری تحریک 'سیوا سمتی' سے نامزدی کی گئی اس میں مسلمانوں کو شریک ہونا حرام حرام، سخت حرام ہے؛ کہ یہ کفریات و ضلالت پر مشتمل ہے۔

خاص ہندوؤں کی وضع کا جھنڈا کہ یہ ان کے شعار سے ہے یہی پتا دے رہا ہے کہ یہ خاص ہنود کی جماعت ہے، اور ایسی جماعت میں مسلمان کا منسلک ہونا، ہندوؤں کے جھنڈے کے نیچے آنا اور کام کرنا، اور اس کا حامی بننا کب روا ہو سکتا ہے؟ پھر ہندوؤں کی طرح اس کے آگے سر خم کرنا اور ونڈوت کرنا، تشبہ بہنود (ہنود کے ساتھ مشابہت) ہے، اور حدیث میں فرمایا:

«مَنْ تَشَبَّهَ بِقَوْمٍ فَهُوَ مِنْهُمْ» (جس نے کسی قوم کی مشابہت اختیار کی، وہ انہی میں سے ہے)۔

اور سنسکرت زبان میں وہ مدح سرائی اور وہ بھی ہند کی دیوی کی! یہ بھی خاص کفار کا طریقہ ہے، بلکہ کفر ہے۔ اور کچھ بعید نہیں کہ اس میں دیگر الفاظِ کفر بھی ہوں، اور نہ سہی تو یہ دیوی کی مدح سرائی کیا کفر نہیں؟ اور جے بولنا بھی خاص ہندوؤں ہی کا شیوہ ہے، اور وہ بھی بھارت ماتا کی، کہ یہ تو ہندوؤں ہی کی ماتا ہوگی۔

اور سب سے شدید واشد خیانت یہ ہے کہ اس کی آڑ میں ہندو سنگٹھن کے مقاصد پورے کرنا اس کا کام ہے، اور اس کے اہم مقاصد میں ہنود کا باہم اتحاد اور مسلمانوں پر ان کا تسلط اور مسلمانوں کو مرتد بنانے کی کوشش وغیرہ وغیرہ ہے۔ اور چونکہ یہ 'سیوا سمتی' ہندوؤں سے خصوصیت رکھتی ہے (اور) اسلام و مسلمین سے ذرا بھی تعلق منظور نہیں، اس وجہ سے ہندوستان کی موجودہ زبان اردو، جسے ہندوؤں نے مسلمانوں کی زبان سمجھ رکھا ہے، ترک کر دی گئی ہے، اور زبان بھی وہی جاری کرنا چاہتے ہیں جو خالص ہندو زبان ہے۔ اور جب اس کا مقصد پوشیدہ ہندو سنگٹھن کو کامیاب کرنا ہے، تو یہ بالکل کفر کی مشین ہے۔ اور مسلمانوں کو اس میں شریک ہونے کے یہ معنی ہیں کہ کفار کو خاص ان کے مذہب باطل کی ترویج میں اعانت دیتے ہیں۔ قرآنِ کریم تو اعانت علی الاثم کو حرام فرماتا ہے: ﴿وَلَا تَعَاوَنُوا عَلَى الْإِثْمِ وَالْعُدْوَانِ﴾ (المائدة، الآیة: 2) ترجمہ کنزالایمان: اور گناہ اور زیادتی پر باہم مدد نہ دو۔ اور بے شک اعانت علی الاثم اثم ہے، یوں ہی اعانت علی الکفر بھی کفر ہے۔

خلاصہ یہ کہ اس کے قوانین از اول تا آخر سراسر باطل اور اسلام کے بالکل مخالف ہیں؛ اب بھی سب کچھ دیکھ کر مسلمانوں کی آنکھیں نہ کھلیں اور نافع و مضر، بلکہ دوست و دشمن میں تمیز نہ کریں، تو سوا اس کے اور کیا کہا جا سکتا ہے کہ ان میں اسلامی احساس نہ رہا، اور اپنے تراشیدہ خیالات کا نام اسلام رکھ لیا ہے۔

ولا حول ولا قوة الا بالله العلي العظيم واللہ سبحانه وتعالى أعلم وعلمه جل مجدہ اتم و احکم

(1) ↩ ترجمہ کنزالایمان: تمہیں غالب آؤ گے اگر ایمان رکھتے ہو۔ (آل عمران، الآیة: 139)