حضرت آدم علیہ السلام کی قبر کہاں ہے اور انسانوں کے مزاج مختلف کیوں ہیں

الجواب: اللهم هداية الحق والصواب

بیتُ اللہ شریف کو حضرت آدم علیہ السلام کی قبر بنانا اور دلیل میں یہ  پیش کرنا کہ جب اللہ تعالیٰ نے حضرت آدم علیہ السلام کو پیدا فرمایا تو اسی جگہ کی مٹی لیا تھا غلط ہے اس لئے کہ حدیث اور تفسیر کی معتبر کتابوں سے ثابت ہے کہ حضرت آدم علیہ السلام کا پتلا تیار کرنے کے لئے پوری روئے زمین سے مٹی لی گئی تھی جس میں سیاہ، سفید، سرخ اور کھاری وغیرہ ہر قسم کی مٹی تھی اس لئے ان کی اولاد کا مزاج ہر قسم کا ہے۔

 جیسا کہ حدیث کی مشہور کتاب احمد، ترمذی اور ابوداؤد میں ہے: عَنْ أَبِي مُوسَى الْأَشْعَرِيِّ قَالَ: قَالَ رَسُولُ اللهِ ﷺ: «إِنَّ اللهَ تَعَالَى خَلَقَ آدَمَ» مِنْ قَبْضَةٍ قَبَضَهَا مِنْ جَمِيعِ الْأَرْضِ، فَجَاءَ بَنُو آدَمَ عَلَى قَدْرِ الْأَرْضِ، فَجَاءَ مِنْهُمُ الْأَحْمَرُ وَالْأَبْيَضُ وَالْأَسْوَدُ وَبَيْنَ ذَلِكَ، وَالسَّهْلُ وَالْحَزْنُ، وَالْخَبِيثُ وَالطَّيِّبُز (سنن الترمذي - ت بشار – الترمذي (٥ ‏/ ٧١) یعنی ابو موسیٰ اشعری رضی اللہ عنہ نے کہا کہ رسولُ اللہ صلی اللہ علیہ وسلم وسلم کو یہ فرماتے ہوئے میں نے سنا ہے کہ خدا تعالیٰ نے حضرت آدم علیہ السلام کو ایک مٹھی مٹی سے پیدا کیا ہے جو پوری زمین سے لی گئی تھی تو آدم علیہ السلام کی اولاد کا مزاج زمین کے مطابق ہے کہ بعض ان میں سے سرخ ہیں ، بعض سفید ، بعض کالے ہیں اور بعض ان کے درمیان اور بعض نرم مزاج ہیں اور بعض سخت مزاج اور کچھ پاک طبیعت کے ہیں اور کچھ نا پاک طبیعت کے۔ (مشکوۃ شریف ص ۲۲)

اور تفسیر جلالین ص ۷ پر ہے: خَلَقَ اللَّه تَعَالَى آدَم مِنْ أَدِيم الْأَرْض أَيْ وَجْههَا بِأَنْ قَبَضَ مِنْهَا قَبْضَة مِنْ جَمِيع أَلْوَانهَا۔ (تفسير الجلالين – المحلي، جلال الدين (٨)  یعنی اللہ تعالیٰ نے روئے زمین سے ہر رنگ کی ایک ایک مٹھی لے کر حضرت آدم علیہ السلام کو پیدا فرمایا۔

 اور تفسیر صاوی جلد اول ص ۱۹ میں ہے: هو ماخوذ من اديم الأرض لخلقه من جميع اجزائها وكانت ستين جزا ولذالك كانت طباع بنيه ستين طبعاً یعنی لفظ آدم ادیم الارض سے ماخوذ ہے اس لئے کہ حضرت آدم علیہ السلام کی پیدائش زمین کے تمام اجزاء سے ہوئی ہے جو ساٹھ جز ہیں اس لئے ان کی اولاد کی طبیعتیں ساٹھ قسم کی ہیں۔

 اور تفسیر جمل جلد ثانی ص ۴۳ میں ہے: انه كان تراباً متفرق الاجزاء  یعنی حضرت آدم علیہ السلام کا پتلا مختلف حصوں کی مٹی سے تیار ہوا تھا۔

اور تفسیر ابو السعود علی ہامش تفسیر کبیر جلد اول ص ۲۶۴ میں ہے: انه تعالى قبض قبضة من جميع الأرض یعنی خدا تعالى نے آدم علیہ السلام کو پیدا کرنے کے لئے پوری زمین سے ایک مٹھی مٹی لی ۔

اور تفسیر خازن جلد اول ص ۳۶ میں ہے: وقبض منها قبضة من جميع بقاعها من عذبها ومالحها وحلوها ومرها وطيبها وخبيثها۔(تفسير الخازن لباب التأويل في معاني التنزيل – الخازن (١ ‏/ ٣٦) یعنی حضرت عزرائیل علیہ السلام نے خدا تعالیٰ کے حکم سے حضرت آدم علیہ السلام کا پتلا تیار کرنے کے لئے زمین کے ہر حصے سے ایک مٹھی مٹی جس میں خوشگوار، نمکین، میٹھی ، کڑوی، اچھی اور خراب ہر قسم کی مٹی تھی،

اور تفسیر روح البیان جلد اول ص ۹۹ میں ہے: فقبض قبضة من وجه الأرض مقدار أربعين ذراعا من زواياها الأربع فلذلك يأتى بنوه اخيافا اى مختلفين على حسب اختلاف ألوان الأرض وأوصافها فمنهم الأبيض والأسود والأحمر واللين والغليظ۔(روح البيان – إسماعيل حقي (١ ‏/ ٩٩) یعنی حضرت عزرائیل علیہ السلام نے حضرت آدم علیہ اسلام کا پتلا تیار کرنے کے لئے زمین کے ہر حصے سے چالیس ہاتھ مٹی لی اس لئے زمین کے رنگ اور اس کی حالتوں کے مختلف ہونے کے لحاظ سے ان کی اولاد بھی مختلف ہے کہ ان میں سے بعض سفید، بعض کالے بعض سرخ بعض نرم اور بعض سخت ہیں۔

حدیث شریف اور معتبر تفسیروں کے ان تمام حوالہ جات سے روز روشن کی طرح واضح ہو گیا کہ حضرت آدم علیہ السلام پوری روئے زمین کی ہر قسم کی مٹی سے بنائے گئے ہیں۔ لہذا یہ کہنا غلط ہے کہ جہاں بیت اللہ شریف ہے صرف وہاں کی مٹی سے بنائے گئے ہیں اور یہ کہنا بھی غلط ہے کہ بیتُ اللہ شریف حضرت آدم علیہ السلام کی قبر ہے اس لئے کہ ان کی قبرمنٰی میں مسجد خیف کے پاس ہے اسی طرح تفسیر عزیزی وغیرہ میں حضرت مجاہد سے روایت ہے۔ (تفسیر نعیمی جلد اول ص ۲۰۴) 

وهو تعالى ورسوله الأعلى اعلم بالصواب.

کتبــــــه : جلال الدين احمد الامجدی

۱۳ صفر المظفر ۱۴۰۱ھ