خوف اور رکاوٹ کے باوجود حج کا حکم

وجوب حج کی شرطوں میں سے ایک شرط امن طریق بھی ہے یعنی اگر سلامتی کا غالب گمان ہو تو جانا واجب ہے اور اگر ہلاکت کا غالب گمان ہو تو جانا واجب نہیں۔

 جیسا کہ فتاوی عالمگیری میں تبیین سے ہے: قَالَ أَبُو اللَّيْثِ إنْ كَانَ الْغَالِبُ فِي الطَّرِيقِ السَّلَامَةَ يَجِبُ، وَإِنْ كَانَ خِلَافَ ذَلِكَ لَا يَجِبُ وَعَلَيْهِ الِاعْتِمَادُ(الفتاوى العالمكيرية = الفتاوى الهندية – محمد أورنك عالم كير (١ ‏/ ٢١٨) ۔ اس قول پر علامہ ابن نجیم مصری نے بحر الرائق میں اور علامہ ابن عابدین شامی نے ردالمحتار میں بھی اعتماد فرمایا ہے اور ملاعلی قاری نے شرح النقایہ میں فرمایا یہ قول مفتیٰ بہ ہے اور ظاہر یہ ہے کہ غلبہ سلامتی کے ساتھ خوف کے غالب نہ ہونے کا بھی اعتبار کیا جائے گا۔ جیسا کہ امام  ابن ہمام نے فتح القدیر میں فرمایا: وَاَلَّذِي يَظْهَرُ أَنْ يُعْتَبَرَ مَعَ غَلَبَةِ السَّلَامَةِ عَدَمُ غَلَبَةِ الْخَوْفِ۔ (فتح القدير للكمال بن الهمام - ط الحلبي – الكمال بن الهمام (٢ ‏/ ٤١٨) ۔ پھر اسی قول کو بحر الرائق اور ردالمختار میں نقل کرنے کے بعد برقرار رکھا۔ لہذا وہ لوگ جو کسی ظالم حکومت میں رہتے ہیں اگر ان کو حج کی ادائیگی میں خوف کا غلبہ ہو تو ان لوگوں پر حج واجب نہیں ورنہ واجب ہے اور حج کرنے میں اگر بعض لوگوں کو قید و بند کی تکلیفیں اٹھانی پڑیں یا بعض حجاج قتل کر دیئے جائیں تو یہ مانع وجوب حج نہیں ۔ اس لئے کہ پانی کی قلت ، گرم ہوا کی تکلیف اور بعض حجاز مقدسہ کا سفر زمانہ سابق میں اکثر محفوظ نہ تھا اس کے باوجود حج فرض رہا۔ ہاں اگر حج کرنے کے سبب ظالم حکومت اکثر حجاج کو قتل کر دے تو اس صورت میں حج فرض نہ ہوگا۔

ردالمحتار میں ہے: غَلَبَةَ السَّلَامَةِ لَيْسَ الْمُرَادُ بِهَا لِكُلِّ أَحَدٍ بَلْ لِلْمَجْمُوعِ، وَهِيَ لَا تَنْتَفِي إلَّا بِقَتْلِ الْأَكْثَرِ أَوْ الْكَثِيرِ۔ (حاشية ابن عابدين = رد المحتار ط الحلبي – ابن عابدين (٢ ‏/ ٤٦٣)

اور فتاوی بزازیہ میں فرمایا: والمختار عدم السقوط لان البادية والطريق ماخلت عن آفة ومانع ما واني يوجد رضا الله تعالى وزيارة الاماكن الشريفة بلا مخاطرة 

اور حج کرنے کے لئے کچھ رشوت دینا پڑے جب بھی جانا واجب ہے اور چونکہ مسلمان اپنے فرائض ادا کرنے کے لئے مجبور ہیں اس لئے دینے والوں پر مواخذہ نہیں۔

 در مختار میں ہے: (مع أمن الطريق) بغلبة السلامة ولو بالرشوة على ما حققه الكمال۔ (الدر المختار شرح تنوير الأبصار وجامع البحار – علاء الدين الحصكفي (١٥٦)

اور فتح القدیر و بحر الرائق میں ہے: وَعَلَى تَقْدِيرِ أَخْذِهِمْ الرِّشْوَةَ فَالْإِثْمُ فِي مِثْلِهِ عَلَى الْآخِذِ لَا الْمُعْطِي عَلَى مَا عُرِفَ مِنْ تَقْسِيمِ الرِّشْوَةِ فِي كِتَابِ الْقَضَاءِ وَلَا يُتْرَكُ الْفَرْضُ لِمَعْصِيَةِ عَاصٍ۔ (البحر الرائق شرح كنز الدقائق ومنحة الخالق وتكملة الطوري – زين الدين ابن نجيم (٢ ‏/ ٣٣٨)

اور مذکورہ بالا حالات میں جن لوگوں نے حج کر لیا اور ان کا حج فرض ادا ہو گیا۔

هذا ما ظهر لي والعلم بالحق عند الله تعالى ورسوله الاعلى جل جلاله و صلى المولىٰ عليه وسلم

کتبــــــه : جلال الدین احمد الامجدی

۸ ربیع الاول ۱۴۰۰ھ