زید و عمر میں اس بات پر گفتگو ہوئی کہ حضور مظہرِ خدا ہیں، اللہ عالمُ الغیب ہے، حضور بھی عالمُ الغیب۔ اللہ حیّ و قیّوم ہے، حضور بھی حیّ و قیّوم ہیں بعطائے الٰہی۔ تو بکر نے کہا کہ بندے پر عالمُ الغیب کا یا حیّ و قیّوم کا اطلاق جائز نہیں۔ حضور صلی اللہ علیہ وسلم عالمِ غیب، یعنی غیب داں ضرور ہیں، اسی طرح قیّوم نہیں، قَیِّم ضرور ہیں وغیرہ وغیرہ، ان مسائل کو واضح طور پر تحریر فرمائیں۔
حضور صلی اللہ علیہ وسلم عالمِ غیب، یعنی غیب داں ضرور ہیں، لیکن عالمُ الغیب کا اطلاق حضور پر جائز نہیں۔ هكذا قال العلماء لأهل السنة والجماعة اور بیشک حضور علیہ الصلوۃ حیّ، یعنی زندہ ہیں، حدیث شریف میں ہے:
إِنَّ الله حَرَّمَ عَلَى الْأَرْضِ أَنْ تَأْكُلَ أَجْسَادَ الْأَنْبِيَاءِ فَنَبِيُّ الله حَيٌّ يُرْزَقُ— مشكاة المصابيح – الخطيب ولي الدين التبريزي (١ / ٤٣١)
مگر حضور صلی اللہ علیہ وسلم کو قیّوم کہنا جائز نہیں کہ یہ خدا تعالیٰ کے اسمائے خاصّہ سے ہے، جیسے رحمٰن۔ - وهو تعالىٰ اعلم
⚠️ نوٹ: شیئر کارڈ میں اردو کے علاوہ دوسری زبان میں تصویر صحیح نہیں آتی، براہِ کرم پی ڈی ایف ڈاؤن لوڈ کیجئے۔