حجِ اِفراد کے مسائل اور وقوفِ عرفہ سے پہلے ممنوعاتِ احرام کا حکم

الجواب بعون الملك الوهاب :

1) ) مسائل سے لا علمی کوئی عذر نہیں ہے جس پر حج فرض ہوا یا حج کرنا چاہتا ہے اس پر فرض ہے کہ وہ حج کے مسائل سیکھے۔

( 2) حج تین طرح کے ہیں :

 (۱) اِفراد (۲) تمتع (۳)قِران

ان میں جس طرح کا حج کرے گا اس کی نیت احرام کے وقت ہی ضروری ہے۔ صرف حج کی نیت ہو وہ اِفراد کہلاتا ہے۔ اس میں طواف و سعی کے بعد مسجد الحرام شریف میں داخل ہو کر دو رکعت نماز پڑھے مگر حلق یا تقصیر جائز نہیں ، بلکہ حالت احرام میں یوم الترویہ (آٹھویں ذی الحجہ) تک مکہ شریف میں قیام کرے۔

 یوم الترویہ سے دیگر افعال حج ادا ہوں گے۔ ابھی اس کے لیے ممنوعات احرام حلال نہیں ہوئے ، اگر جماع کر لے گا تو حج فاسد ہو جائے گا۔ جس کے نتیجہ میں دم بھی لازم ہو گا اور آئندہ سال حج ادا کرنا ہوگا۔

 فتاوی قاضی خاں ج:1 صفحہ: 179 میں ہے:

اذا فرغ من السعى يدخل المسجد ويصلى ركعتين ثم يقيم مكة حراما يوم التروية ولا يحل له شيء من المحصورات مادام بمكة.

جب مفرد سعی سے فارغ ہو جائے تو مسجد حرام میں داخل ہو کر دو رکعت نماز پڑھے، پھر مکہ شریف میں یوم ترویہ تک حالتِ احرام میں رہے۔ اس دوران اس کے لیے احرام کے ممنوعات حلال نہیں۔

فتاویٰ تا تار خانیہ ج: 3 ص 579 میں ہے:

وان كان مفردا بالحج ان جامع قبل الوقوف بعرفة فسد حجه وعليه دم وعليه الحج من قابل .

اگر مفرد نے وقوفِ عرفہ سے پہلے جماع کر لیا تو حج فاسد ہو گیا اس پر دم واجب ہے اور سال آئندہ قضا بھی۔

واللہ تعالی اعلم