رشوت یا سود کے مال سے حج کرنے کا شرعی حکم

الجواب بعون الملك الوهاب 

مالِ حرام سے حج کرنا جائز نہیں اگر کر لیا تو فریضہ ادا ہو جائے گا مگر قابل قبول نہیں ہوگا۔

المعجم الاوسط ج: ۵ ص: ۲۵۱ میں ہے:

 اذا خرج الرجل حاجا بنفقة طيبة ووضع رجله في الغرز، فنادي لبيك اللهم لبيك، ناداه من السماء لبيك وسعديك، زادك حلال، وراحلتك حلال، وحجك مبرور، غير مأزور، واذا خرج بالنفقة الخبيثة فضع رجله في الغرز فنادي : لبيك، ناداه مناد من السماء : لا لبيك ولا عديك زادك حرام ونفقتك حرام وحجك غير مبرور

جب کوئی شخص پاک مال سے حج کے لیے نکلتا ہے اور رکاب میں پاؤں رکھتا ہے اور لبيك اللهم لبیک کہتا ہے، تو آسمان سے یہ صدا آتی ہے: لبيك و سعديك تیرا توشہ حلال ہے ، تیری سواری حلال اور واضح طور پر تیرا حج مقبول ہے۔ مگر جب کوئی شخص خبیث مال لے کر حج کے لیے نکلتا ہے اور رکاب میں پاؤں رکھتا ہے اور لبيك اللهم لبیک پکارتا ہے، تو آسمان سے یہ صدا آتی ہے: نہ تیری حاضری قبول نہ تیری خدمت قبول ، تیرا تو شہ حرام ، تیرا نفقہ حرام اور تیرا حج غیر مقبول ۔

فتاوی ہندیہ ج : ۱، ص ۳۸۳ میں ہے:

 فانه لا يقبل الحج بالنفقة الحرام مع أنه يسقط الفرض معها .

مال حرام سے حج مقبول نہیں ہوتا ہے البتہ اس کے ذمہ سے حج کی فرضیت ساقط ہو جاتی ہے۔

فتاوی رضویہ ج: ۱۰، ص ۷۰۹ میں ہے:

رشوت وغیرہ حرام مال کاحج میں صرف کرنا حرام ہے اور قابل قبول نہ ہو گا اگر چہ فرض ساقط ہو جائے گا۔ حدیث میں ارشاد ہوا کہ جو مال حرام لے کرحج کو جاتا ہے اور جب وہ لبیک کہتا ہے فرشتہ جواب دیتا ہے :

لا لبيك ولا سعديك، حتى ترد ما في يديك و حجك مردود عليك یعنی تیری حاضری قبول نہ تیری خدمت قبول اور تیراحج تیرے منہ پر مردود ، جب تک کہ حرام مال تیرے ہاتھ میں ہے، واپس نہ دے۔

واللہ اعلم بالصواب