ماں باپ کو حج کرانے سے اپنا فرض ذمے سے ساقط نہ ہو گا

آپ جب اپنے والدین سے دور دراز رہ کر کماتے ہیں۔ تو جو کچھ کماتے ہیں وہ سب آپ کی ملک ہے۔ ہاں !اگر اپنی کمائی اپنے باپ کو دے دیتے ہیں تو جو کچھ باپ کو دے دیں گے وہ باپ کی ملک ہو جائے گا۔ اگر آپ کے پاس آپ کی کمائی سے اتنا ہے کہ آپ حج کر سکیں تو خود آپ پر حج فرض ہو گیا۔ اور ضرور آپ کو جلد از جلد حج کر لینا ضروری ہے۔
اسی طرح اگر آپ کے والدین کے پاس، یا ان میں سے کسی ایک کے پاس اتنا سرمایہ ہے کہ ان پر حج فرض ہے تو انھیں بھی لازم ہے کہ جلد از جلد حج کر لیں ۔ اگر آپ پر حج فرض ہے اور ماں باپ کو حج کرادیں گے تو آپ کا فرض ذمہ سے ساقط نہ ہو گا۔ یوں ہی اگر باپ پر، یا ماں پر ، یا دونوں پر حج فرض ہے وہ نہ کریں اور آپ کر لیں تو وہ بری الذمہ نہ ہوں گے ۔
والدین کے حقوق اولاد پر یہ ہیں کہ اولاد ان کو راضی رکھیں، ان کی خدمت کریں، ان کو کسی طرح ایذا نہ پہنچائیں۔ والدین پر اولاد کے حقوق یہ ہیں کہ ان کی پرورش کریں، دین سکھائیں، دین دار بنائیں، کمانے کا ہنر سکھائیں وغیرہ وغیرہ ۔ اگر مذکورہ بالا تفصیل کے مطابق آپ پر حج فرض ہے تو آپ ضرور ج کریں، والدین پر بھی فرض ہے تو وہ بھی ضرور کریں۔ اور اگر آپ پر فرض ہے والدین پر نہیں اور آپ کو وسعت ہے کہ انھیں بھی حج کرا دیں تو آپ بھی حج کرلیں اور انھیں بھی کرادیں یہ آپ کی بہت بڑی سعادت ہوگی ۔ واللہ تعالی اعلم