تعزیہ داری ناجائز ہے، لیکن اس سے نکاح نہیں ٹوٹتا

تعزیہ بنانا، تعزیہ پر فاتحہ دلانا، محرم میں بچوں کو فقیر بنانا، تعزیہ داری کی مجلس میں جانا، تعزیہ کے سامنے مرثیہ پڑھنا، ٧محرم کو امام باڑہ یا کربلا جانا، سب خرافات و ناجائز و گناہ ہیں ۔ البتہ امام عالی مقام رضی اللہ عنہ کے ذکر کی مجلس قائم کرنا، اس میں نظم یا نثر میں فضائل امام حسین واہل بیت پڑھنا، واقعات شہادت پڑھنا، اپنے گھر حضرت امام کا نیاز و فاتحہ کرنا، اس کے لیے قرآن خوانی کرنا جائز و مستحسن و باعث اجر ہے۔ جس جاہل مولوی نے یہ کہا کہ جو تعزیہ نکلتا ہے اس کا نکاح ٹوٹ جاتا ہے ، غلط کہا۔ اس نے بے علم فتوی دے کر زمین و آسمان کے فرشتوں کی لعنت مول لی۔

حدیث میں ہے: من أفتى بغير علم لعنته ملئكة السموات والأرض .(تاريخ مدينة دمشق لابن عساكر ، ج : ٥٢ ، ص : ۲۰ ، دار الفکر، بيروت، لبنان)

یہ بنام مولوی جاہل نہ ہوتا تو ایسا فتوی نہ دیتا۔ تعزیہ بنانا، نکالنا ناجائز ضرور ہے ، مگر کفر و شرک نہیں کہ اس سے نکاح ٹوٹے ، البتہ ایسا کہنے کی وجہ سے اس مولوی کا نکاح ضرور ٹوٹ گیا۔ اس لیے کہ اس نے مسلمان کو کافر کہا، کسی مسلمان کو کافر کہنے والا خود کافر ہے۔ واللہ تعالی اعلم