"یا جنید" کہہ کر دریا پار کرنے کے واقعہ کی حقیقت اور اس کا حکم

یا جنید یا جنید کہہ کر دریا پار کرنے کا واقعہ مجدد اعظم، اعلیٰ حضرت امام احمد رضا بریلوی رضی عنہ ربہ القوی کا بیان فرمانا اور امام الفقہاء حضور مفتی اعظم ہند علیہ الرحمۃ والرضوان کا اسے الملفوظ میں تحریر فرمانا، واقعۂ مذکورہ کے مستند ہونے کی کھلی ہوئی دلیل ہے۔ لہٰذا زید کا اس کو بیان کرنا درست ہے۔ اور بکر کا اس واقعہ کو بے بنیاد، بے اصل کہنا اور اسے گمراہ کن قرار دینا غلط ہے۔ اور ثبوت میں عبارتِ مذکورہ کا پیش کرنا صحیح نہیں، اس لیے کہ اعلیٰ حضرت نے اصل واقعہ کو غلط قرار نہیں دیا ہے بلکہ سوال میں جتنی باتیں خلافِ واقعہ تھیں صرف ان کا غلط ہونا ظاہر فرمایا ہے۔ اگر کوئی کہے کہ یا جنید یا جنید کہے تو نہ ڈوبے اور اللہ اللہ کہے تو ڈوب جائے، یہ کیسے ہو سکتا ہے؟ تو ایسا کہنے والے کو صوبہ مہاراشٹر میں پونہ بھیج دیا جائے کہ اسی شہر کے قریب حضرت قمر علی درویش رحمۃُ اللہ تعالیٰ علیہ کا مزار مبارک ہے۔ وہاں ایک بڑا گول پتھر ہے جس کا وزن نوّے (۹۰) کلو بتایا جاتا ہے۔ وہ قمر علی درویش کہنے پر انگلیوں کے معمولی سہارا دینے سے اوپر اٹھتا ہے اور اللہ کہنے سے نہیں اٹھتا۔ میں بذاتِ خود اس کا تجربہ کر چکا ہوں۔ اس میں کیا راز ہے اللہ ہی بہتر جانتا ہے۔ اور الملفوظ کو غیر مستند بتانا امام الفقہاء حضور مفتی اعظم ہند مصطفیٰ رضا خان علیہ الرحمۃ والرضوان کی کھلی ہوئی توہین ہے۔ وَہُوَ تَعَالٰی اَعْلَم

كتبہ:

جلال الدین احمد الامجدی