کیا فرماتے ہیں علمائے دین ومفتیان شرع متین مسئلہ ذیل میں :
حضرت آدم علیہ السلام نے جب حضور اقدس صلی اللہ علیہ وسلم کے نام پاک کا واسطہ دیا تو ان کی دعا قبول ہوئی تھی اس کے متعلق کوئی حدیث یا تفسیر موجود ہے یا نہیں؟ کہیں ہو تو براہِ کرم مع حدیث و تشریح جواب تحریر فرمائیں۔
الجواب بعون الملك الوهـــاب
بیہقی ، حاکم نے مواہب لدنیہ سے نقل کیا ہے : ”عَنْ عُمَرَ بْنِ الْخَطَّابِ، قَالَ: قَالَ رَسُولُ اللهِ صَلَّى الله عَلَيْهِ وَسَلَّمَ:لَمَّا اقْتَرَفَ آدَمُ الْخَطِيئَةَ قَالَ: يَا رَبِّ أَسْأَلُكَ بِحَقِّ مُحَمَّدٍ لَمَا غَفَرْتَ لِي، فَقَالَ اللَّهُ: يَا آدَمُ، وَكَيْفَ عَرَفْتَ مُحَمَّدًا وَلَمْ أَخْلُقْهُ؟ قَالَ: يَا رَبِّ، لِأَنَّكَ لَمَّا خَلَقْتَنِي بِيَدِكَ وَنَفَخْتَ فِيَّ مِنْ رُوحِكَ رَفَعْتُ رَأْسِي فَرَأَيْتُ عَلَىَ قَوَائِمِ الْعَرْشِ مَكْتُوبًا لَا إِلَهَ إِلَّا اللَّهُ مُحَمَّدٌ رَسُولُ اللَّهِ فَعَلِمْتُ أَنَّكَ لَمْ تُضِفْ إِلَى اسْمِكَ إِلَّا أَحَبَّ الْخَلْقِ إِلَيْكَ، فَقَالَ اللَّهُ تعالى: صَدَقْتَ يَا آدَمُ، إِنَّهُ لَأُحِبُّ الْخَلْقِ إِلَيَّ وإذَا سَأَلْتَنِي بِحَقِّهِ فَقَدْ غَفَرْتُ لَكَ وَلَوْلَا مُحَمَّدٌ مَا خَلَقْتُكَ“۔ (المواهب اللدنية – القسطلاني ،(ت ٩٢٣هـ)، ج 1، ص 54-55، المكتبة التوفيقية، القاهرة- مصر/ كنز العمال - علاء الدين علي المتقي الهندي (ت ٩٧٥ هـ)، ج 11، ص: 455، الحديث 32138، مؤسسة الرسالة) حضرت عمر بن خطاب رضی اللہ تعالیٰ عنہ سے مروی ہے انہوں نے کہا کہ رسول اللہ صلی اللہ علیہ وسلم نے فرمایا کہ جب آدم علیہ السلام خطا سے ملوث ہوئے تو انہوں نے عرض کی کہ اے میرے رب ! میں تجھ سے بوسیلہ محمد (صلی اللہ علیہ وسلم ) سوال کرتا ہوں کہ تو میری مغفرت فرما۔ اللہ تعالیٰ نے فرمایا : اے آدم ! تم نے محمد (صلی اللہ علیہ وسلم ) تم کو کیسے پہچانا؟ حالاں کہ میں نے ابھی انہیں پیدا بھی نہیں کیا۔ عرض کیا : اے رب ! جب تو نے مجھے پیدا کیا اور میرے اندر اپنی طرف سے روح ڈالی تو میں نے اپنا سر اٹھایا اور عرش کے پایہ پر لکھا ہوا دیکھا ”لا الله الا الله محمد رسول الله“ تو میں نے جان لیا کہ تو نے اپنے نام کے ساتھ اپنے محبوب مخلوق کا نام ملایا ہے۔ تو اللہ تعالیٰ نے فرمایا کہ اے آدم! تو نے سچ کہا وہ میرے نزدیک مخلوقات میں سب سے زیادہ محبوب ہیں، جب تو نے ان کے توسل سے سوال کیا ہے تو میں نے تیری مغفرت کر دی ہے اگر محمد (صلی اللہ علیہ وسلم ) نہ ہوتے تو میں تجھ کو پیدا نہ کرتا۔
والله اعلم باالصواب و رسوله صلى الله عليه وسلم
⚠️ نوٹ: شیئر کارڈ میں اردو کے علاوہ دوسری زبان میں تصویر صحیح نہیں آتی، براہِ کرم پی ڈی ایف ڈاؤن لوڈ کیجئے۔