داڑھی منڈوانا حرام ہے، فاسق معلن کے پیچھے نماز مکروہ تحریمی واجب الاعادہ ہے

الجواب بعون الملك الوهــــــــاب

حنفیہ کے نزدیک بقدر قبضہ ( ایک مشت )  رکھنا واجب ہے اور منڈوانا حرام ہے۔ اشعۃ اللمعات شرح مشکوۃ میں حضرت شیخ محقق مولانا عبد الحق محدث دہلوی فرماتے ہیں : "گذاشتن آن بقدر قبضہ واجب است"  یعنی داڑھی کا یک مشت بڑھانا واجب ہے۔ درمختار میں ہے : "يحرم على الرجل قطع لحيته"  (الدر المختار، ج 1، ص 560 ، كتاب الحظر والإباحة ، باب الاستبراء وغيره) مرد کو داڑھی منڈانا حرام ہے۔ لہٰذا امام داڑھی منڈانے یا حد شرع سے کم کرانے یا خلاف شرع لباس پہننے کی وجہ سے فاسق معلن ہے اور فاسق معلن کے پیچھے نماز مکروہ تحریمی ، اور پڑھی گئی نماز کا لوٹانا واجب ہے۔ خلاصہ یہ کہ امام جب تک تو بہ کر کے یک مشت داڑھی نہ رکھے یا موافق شرع لباس استعمال نہ کرے، اس وقت تک ان کے پیچھے نماز جائز نہیں ۔ امام سنی صحیح العقیدہ صحیح القرآۃ اور مسائل نماز و طہارت سے واقف غیر فاسق معلن ہونا چاہیے۔

والله اعلم باالصواب و رسوله صلى الله عليه وسلم

کتبہ: محمد عبد الحلیم رضوی اشرفی

جامعہ عربیہ اسلامیہ ناگپور