مردے سنتے ہیں،”لَا تُسْمِعُ الْمَوْتٰى“کے ذریعے اعتراض کا جواب

الجواب بعون الملك الوهـــاب

حدیث شریف میں ہے: ” لَقِّنُوا مَوْتَاكُمْ لَا إِلَهَ إِلَّا اللهُ.“ (مشكاة المصابيح،  ج:1 ، ص: 508، کتاب الجنائز/ صحيح مسلم، ج 2، ص 631، كتاب الجنائز، باب تلقين الموتى لا إله إلا الله، الحدیث : 916) اپنے مردوں کو  لا الہ الا اللہ کی تلقین کرو۔ اس حدیث کے دو معنی ہو سکتے ہیں ایک تو یہ کہ جو مر رہا ہو اس کو کلمہ کی تلقین کرو ۔ دوسرے یہ کہ جو مر چکا ہو اس کو کلمہ سکھاؤ۔ پہلا معنی مجازی اور دوسرا معنی حقیقی ہے۔ اور بلا وجہ معنی مجازی مراد لینا ٹھیک نہیں ۔ لہذا حدیث کا مطلب یہ ہوا کہ اپنے مردوں کو کلمہ کی تلقین کرو اور کلمہ کی تلقین بعد از دفن ہی ہو سکتی ہے۔چنانچہ  فتاوی شامی، جلد اول،  باب الدفن، بحث تلقین بعد المیت  میں ہے: ”أَمَّا عِنْدَ أَهْلِ السُّنَّةِ فَالْحَدِيثُ أَيْ «لَقِّنُوا مَوْتَاكُمْ لَا إلَهَ إلَّا الله» مَحْمُولٌ عَلَى حَقِيقَتِهِ لِأَنَّ الله تَعَالَى يُحْيِيهِ عَلَى مَا جَاءَتْ بِهِ الْآثَارُ وَقَدْ رُوِيَ عَنْهُ «أَنَّهُ أَمَرَ بِالتَّلْقِينِ بَعْدَ الدَّفْنِ فَيَقُولُ: يَا فُلَانَ بْنَ فُلَانٍ اُذْكُرْ دِينَك الَّذِي كُنْت عَلَيْهِ۔“ (رد المحتار، ج 2، ص 191، باب الدفن، بحث تلقین بعد الميت) اہلِ سنت کے نزدیک یہ حدیث " لَقِّنُوا مَوْتَاكُمْ" اپنے حقیقی معنی پر محمول ہے۔ اور حضور  صلی اللہ علیہ وسلم  سے روایت ہے کہ آپ نے دفن کے بعد تلقین کاحکم دیا پس قبر پر کہے اے  فلاں بن فلاں تو اس دین کو یا د رکھ جس پر تھا۔  شامی میں اسی جگہ ہے: ” وَإِنَّمَا لَا يُنْهَى عَنْ التَّلْقِينِ بَعْدَ الدَّفْنِ لِأَنَّهُ لَا ضَرَرَ فِيهِ بَلْ نَفْعٌ فَإِنَّ الْمَيِّتَ يَسْتَأْنِسُ بِالذِّكْرِ عَلَى مَا وَرَدَ فِي الْآثَارِ“ (رد المحتار، ج 2، ص 191، باب الدفن، بحث تلقین بعد الميت) دفن کے بعد تلقین سے منع نہیں  کرنا چاہیے۔ کیوں کہ اس میں کوئی ضرر نہیں بلکہ اس میں میت کا فائدہ ہے کہ وہ ذکر الہی سے انس حاصل کرتی ہے۔ جیسا کہ حدیثوں میں ہے۔

  رہا یہ سوال کہ قبر کے پاس قرآن پڑھنا تو یہ صرف شافعی کے یہاں نہیں بلکہ حنفی کے یہاں بھی جائز ہے۔ فتاوی قاضی خاں اور فتاوی عالمگیری میں ہے:  ”وَإِنْ قَرَأَ الْقُرْآنَ عِنْدَ الْقُبُورِ إنْ نَوَى بِذَلِكَ أَنْ يُؤْنِسَهُ صَوْتُ الْقُرْآنِ فَإِنَّهُ يَقْرَأ “ (الفتاوى الهندية – محمد أورنك عالم كير(ت ١١١٨)، ج 5، ص 350، كتاب الكراهية، الباب السادس عشر في زيارة القبور وقراءة القرآن في المقابر، دار الفكر بيروت) مقابر کے پاس قرآن پڑھنے سے اگر یہ نیت ہے کہ قرآن کی آواز سے مردہ کا جی بہلائے تو بے شک پڑھے اس عبارت سے قبر کے پاس مطلقاً قرآن کا پڑھنا ثابت ہوا۔

رہا ”الٓمّٓ“ سے ”مُفْلِحُوْنَ“   تک اور”اٰمَنَ الرَّسُوْلُ “سے آخر سورہ تک پڑھنا تو اس کے بارے میں حدیث ناطق ، طبرانی میں عبدالرحمن علا بن عجلان روایت کرتے ہیں کہ ان کے والد علا نے فرمایا: ”يَا بُنَيَّ إذَا أَنَا مِتَّ فَأَلْحِدْنِي، فَإِذَا وَضَعْتَنِي فِي لَحْدِي، فَقُلْ: بِسْمِ اللهِ وَعَلَى مِلَّةِ رَسُولِ اللهِ، ثُمَّ شِنَّ عَلَيَّ التُّرَابَ شَنًّا، ثُمَّ اقْرَأْ عِنْدَ رَأْسِي بِفَاتِحَةِ الْبَقَرَةِ، وَخَاتِمَتِهَا فَإِنِّي سَمِعْت رَسُولَ اللهِ ﷺ يَقُولُ ذَلِكَ۔“ (نصب الراية – الجمال الزيلعي (ت ٧٦٢)، ج 2، ص 302، كتاب الصلاة، فصل في الدفن، مؤسسة الريان بيروت - لبنان)  اے میرے بیٹے جب میں وفات پا جاؤں تو مجھے لحد میں دفن کرنا اور جب مجھے لحد میں رکھے تو”بِسْمِ اللهِ وَعَلَى مِلَّةِ رَسُولِ اللهِ “ کہنا پھر آہستہ آہستہ مٹی ڈالنا پھر میرے سرہانے سورہ بقرہ کا شروع ( یعنی ”اَلْحَمْدُ“  سے ”مُفْلِحُوْنَ“تک)  اور آخر میں ” اٰمَنَ الرَّسُوْلُ“سے پڑھنا کہ میں نے رسول اللہ  صلی اللہ علیہ وسلم  کو یہ فرماتے سنا۔ مشکوۃ شریف کی ایک اور حدیث حضرت عبداللہ بن عمر رضی اللہ تعالیٰ عنہ سے روایت ہے: ”قَالَ: سَمِعْتُ النَّبِيَّ صَلَّى الله عَلَيْهِ وَسَلَّمَ يَقُولُ:"إِذَا مَاتَ أَحَدُكُمْ فَلَا تَحْبِسُوهُ، وَأَسْرِعُوا بِهِ إِلَى قَبْرِهِ  ، وَلْيُقْرَأْ عِنْدَ رَأْسِهِ فَاتِحَةُ الْبَقَرَةِ، وَعِنْدَ رِجْلَيْهِ بِخَاتِمَةِ الْبَقَرَةِ “ (مشكاة المصابيح – الخطيب ولي الدين التبريزي (ت ٧٤١)، ج 1، ص 538، كتاب الجنائز، باب دفن الميت،الفصل الثالث، الحديث: 1717،المكتب الإسلامي - بيروت)  یعنی حضرت عبداللہ بن عمر نے فرمایا کہ میں نے رسول اللہ صلی اللہ علیہ وسلم  کو فرماتے سنا کہ جب تم میں کا کوئی مر جائے تو اس کو اپنے گھر میں نہ روکو اور اس کو اس کی قبر کی طرف جلدی لے جاؤ۔ اور چاہیے کہ اس کے سرہانے سورہ بقرہ کا شروع (یعنی ”الٓمّٓ“ سے ”مُفْلِحُوْنَ“) اور آخر میں ” اٰمَنَ الرَّسُوْلُ“ تاختم پڑھے۔ ان احادیث اور فقہا احناف کی عبارتوں سے واضح ہو گیا کہ تلقین موتی اور قبر کے پاس قرآن پاک پڑھنا جائز اور باعث ثواب ہے۔

لیکن سوال کا آخری حصہ کہ قبور والے سنتے نہیں اور ثبوت سورہ روم اور سورہ فاطر کی آیتیں تو اس کا مختصر جواب یہ ہے : سماعِ موتی سے متعلق حدیثیں مشہور ہیں ۔ مثال کے طور پر طبرانی کی مذکورہ بالا حدیث کا وہ جز کہ ”مجھ پر آہستہ آہستہ مٹی ڈالنا“ ثبوت ہے اس بات پر کہ مٹی کی آواز کو صاحب قبر سنتے ہیں، چناں چہ حضرت شیخ مولانا عبدالحق محدث دہلوی رحمۃ اللہ تعالیٰ علیہ اشعۃ اللمعات شرح مشکوۃ میں اس حدیث کے تحت لکھتے ہیں ” و ایں اشاره است بآں کہ میت احساس می کند دردناک می شود باآں  چه دردناک می شود بآں زندہ“ (لمعات التنقيح في شرح مشكاة المصابيح – عبد الحق الدهلوي (ت ١٠٥٢)، ج 4، ص : 176، كتاب الجنائز، باب دفن الميت،الفصل الثالث، الحديث: 1717،  دار النوادر، دمشق - سوريا)   یعنی اس سے اشارہ ہے کہ میت کو احساس ہوتا ہے۔ اور تکلیف ہوتی ہے۔ دوسری حدیث امام عقیلی حضرت ا ابو ہریرہ رضی اللہ تعالیٰ عنہ سے روایت کرتے ہیں: ”قَالَ أَبُو رَزِينٍ: يَا رَسُولَ اللهِ إِنَّ طَرِيقِي عَلَى الْمَوْتَى فَهَلْ مِنْ كَلَامٍ أَتَكَلَّمُ بِهِ إِذَا مَرَرْتُ عَلَيْهِمْ؟ قَالَ: «قُلِ: السَّلَامُ عَلَيْكُمْ أَهْلَ الْقُبُورِ مِنَ الْمُسْلِمِينَ وَالْمُؤْمِنِينَ، أَنْتُمْ لَنَا سَلَفٌ وَنَحْنُ لَكُمْ تَبَعٌ، وَإِنَّا إِنَّ شَاءَ اللَّهُ بِكُمْ لَاحِقُونَ»، قَالَ: أَبُو رَزِينٍ يَا رَسُولَ اللهِ يَسْمَعُونَ؟ قَالَ: «يَسْمَعُونَ وَلَكِنْ لَا يَسْتَطِيعُونَ أَنْ يُجِيبُوا»“ (مرقاة المفاتيح شرح مشكاة المصابيح – الملا على القاري  (ت ١٠١٤)، ج 4، ص 1259، كتاب الجنائز، باب زيارة القبور، دار الفكر، بيروت - لبنان) ابورزين رضی اللہ تعالیٰ عنہ نے عرض کیا یا رسول اللہ میرا راستہ مقابر پر سے ہے، کوئی ایسا کلام ہے کہ میں ان کے پاس گزروں تو کہا کروں۔ فرمایا : یوں کہو ”سلام تم پر اے مسلمان قبر والو تم ہمارے آگے ہو اور ہم تمہارے پیچھے ، اور ہم ان شاء اللہ تم سے ملنے والے ہیں “۔ ابور زین رضی اللہ تعالیٰ عنہ نے عرض کیا کہ یا رسول اللہ مردے بھی سنتے ہیں؟ فرمایا : سنتے ہیں ، مگر جواب نہیں دے سکتے۔ مسلم شریف کی ایک اور حدیث ہے: إِنَّ الْمَيِّتَ إِذَا وُضِعَ فِي قَبْرِهِ، إِنَّهُ لَيَسْمَعُ خَفْقَ نِعَالِهِمْ إِذَا انْصَرَفُوا “  (صحيح المسلم  – مسلم  (ت ٢٦١)، ج 4، ص 2201،كتاب الجنة، وصفة نعيمها وأهلها، الحديث : 2870) جب مردہ قبر میں رکھ دیا جاتا ہے اور لوگ واپس آنے لگتے ہیں تو ان کے جوتوں کی آواز کو سنتا ہے۔  بدر میں جب کفار مکہ مارے گئے اور ان سبھوں کو ایک کنویں میں ڈال دیا گیا اور حضور صلی اللہ علیہ وسلم   نے تین روز کے بعد اس کنویں پر تشریف لے جا کر فرمایا : اے فلاں فلاں کے بیٹے ! کیا تم نے حق پایا وہ وعدہ جو تم سے اللہ و رسول نے کیا تھا؟ میں نے حق پایا وہ وعدہ جو میرے رب نے میرے ساتھ کیا تھا۔ اس پر سیدنا فاروق اعظم رضی اللہ تعالیٰ عنہ نے عرض کیا : یا رسول اللہ لی کہ ہم آپ ایسوں کو مخاطب کر رہے ہیں جن میں روحیں نہیں ہیں؟ فرمایا: "وَالَّذِي نَفْسِي بِيَدِهِ مَا أَنْتُمْ بِأَسْمَعَ لِمَا أَقُولُ مِنْهُمْ، وَلَكِنَّهُمْ لَا يَقْدِرُونَ أَنْ يُجِيبُوا “ (صحيح المسلم – مسلم  (ت ٢٦١)، ج 4، ص 2203،كتاب الجنة، وصفة نعيمها وأهلها، الحديث : 2874) قسم ہے اس کی جس کے دست قدرت میں میری جان ہے میں جو فرما رہا ہوں ، اسے تم اس سے زیادہ نہیں سنتے مگر وہ جواب دینے کی طاقت نہیں رکھتے ۔

ان احادیث سے واضح ہو گیا کہ صاحب قبر سنتے ہیں آیت مستفسرہ میں ” اسماع موتی کی نفی ہے نہ کہ سماع موتی “ کی۔  یعنی سنانے کی نفی ہے نہ کہ سننے کی۔ اس کی مثال ایسی ہے جیسے دوسری آیت ”اِنَّكَ لَا تَهْدِیْ مَنْ اَحْبَبْتَ وَ لٰـكِنَّ اللّٰهَ یَهْدِیْ مَنْ یَّشَآءُ“ (القصص: ۵۶) جس کا صاف مطلب یہ ہے کہ ہدایت نبی کی طرف سے نہیں بلکہ خدا کی طرف سے ہے۔ سورۂ فاطر کی وہ آیت جو سماع موتی کی نفی میں پیش کی گئی ہے اس میں "مَنْ" سے مراد کفار، اور قبور سے مراد جسم ہے۔ مطلب یہ کہ اے محبوب تم مردہ  دل کا فر کو نہیں سنا سکتے ۔ تفسیر جلالین میں اسی آیت ” وَ مَاۤ اَنْتَ بِمُسْمِـعٍ مَّنْ فِی الْقُبُوْرِ“ کی بحث یوں کی گئی ہے: ” أي: الكُفَّارَ، شَبَّهَهُم بالمَوتى فَلَا يجيبون“ (تفسیر الجلالین، ج 1، ص 547 ) اے محبوب! تم ان کو نہیں سنا سکتے جو قبروں میں ہیں ۔ یعنی کفار کو اور کفار کو مردوں سے تشبیہ دی گئی ، اس لیے کہ وہ حق کو قبول نہیں کرتے۔ اسی کے حاشیہ پر مدارک سے نقل ہے: ”شبّه الكفار بالموتى، حيث لا ينتفعون بمسموعهم“  (تفسیر الجلالین، ج 1، ص 547 )  یعنی کفار کو مردوں سے تشبیہ دی گئی ہے۔ اس لیے کہ وہ سنی ہوئی باتوں سے نفع نہیں اٹھاتے ۔ آیت کا خلاصہ یہ ہے کہ اے محبوب تم ان کافروں کا لالچ نہ کرو کہ یہ ایمان لے آئیں گے۔ کیوں کہ ان کے قلوب مردہ ہو چکے ہیں اس لیے وہ تمہاری نصیحتوں کو نہیں سنتے۔

والله اعلم باالصواب و رسوله صلى الله عليه وسلم