بسّی میں شرکت کیسی ہے؟ اور اس پیسہ سے حج کرنا کیسا ہے ؟

بِسْمِ اللّٰهِ الرَّحْمٰنِ الرَّحِیْمِ

مذکورہ کمیٹی کا کارو بار سود پر مشتمل ہے جو بلا شبہ نا جائز وسخت حرام ہے، ارشاد باری تعالی ہے:وَ اَحَلَّ اللّٰهُ الْبَیْعَ وَ حَرَّمَ الرِّبٰواؕ  یعنی اللہ نے بیع کو حلال فرمایا اور سود کو حرام (پ ۳ سورہ البقرہ آیت ۲۷۵) اور حدیث پاک میں ہے: لعن رسول الله صلى الله تعالى عليه وسلم آكل الربوا ومؤكله و كاتبه و شاهدیه و قال هم سواء اه ( مشکوة شریف ص ۲۴۴)

اس کی وجہ یہ ہے کہ ایسی کمیٹی کا طریقہ کار یہ ہوتا ہے کہ مثلاً دس آدمی اس طرح کام کرتے ہیں کہ ہر ماہ دس ہزار روپے جمع کرتے ہیں ایک لاکھ روپے ہو جاتے ہیں تو وہ لوگ اس رقم پر آپس میں بولی بولتے ہیں مثلاً زید نے کہا نوے ہزار، بکر نے کہا اسی ہزار، خالد نے کہا پچہتر ہزار تو پچہتر ہزار پر بولی ختم ہوگئی ، خالد نے ایک لاکھ میں سے پچہتر ہزار لے لیا باقی پچیس ہزار کو ڈھائی ڈھائی ہزار سب نے بانٹ لیا اس طرح دسوں آدمی ہر ماہ کرتے ہیں۔ عام طور پر کمیٹی یا بّسی میں یہی طریقہ کار رائج ہے، جس کمیٹی کے تعلق سے یہ سوال دریافت کیا گیا ہے اگر اس کا بھی طریقہ کار یہی ہے تو یہ معاملہ بلا شبہ نا جائز ہے کہ اس میں قرض دے کر سود لینے دینے کی شرط ہے، حدیث پاک میں ہے:  کل قرض جر منفعة فهو ربا- اه ( بیہقی شریف، ج ۵ ص ۵۷۳)

لہذا ایسی کمیٹی کا کاروبار نا جائز وحرام ہے اور اس میں مسلمان کی شرکت نا جائز و گناہ ہے۔ اور مال حرام سے حج کرنا جائز نہیں اگر کیا تو حج مقبول نہ ہوگا البتہ فرض ساقط ہو جائے گا۔ اعلیٰ حضرت امام احمد رضا برکاتی رضی عنہ بہ القوی تحریر فرماتے ہیں کہ حرام مال کا اس (حج) میں صرف کرنا حرام ہے اور وہ حج قابل قبول نہ ہوگا اگر چہ فرض ساقط ہو جائے گا۔ حدیث شریف میں ارشاد ہوا:  جو مال حرام لے کر حج کو جاتا ہے جب وہ لبیک کہتا ہے فرشتہ جواب دیتا ہے:  لا لبيك وسعديك وحجك مردود عليك حتى ترد مافی يديك اھ یعنی نہ تیری حاضری قبول نہ تیری خدمت قبول اور تیرا حج تیرے منھ پر مردود جب تک تو یہ مال حرام جو تیرے دے ہاتھوں میں ہے واپس نہ دے اھ( فتاوی رضویہ ج ۴ص ۶۸۵)

اور ردالمحتار مَطْلَبٌ فِيمَنْ حَجّ بِمَالٍ حَرَامٍ  میں ہے:   قَالَ فِي الْبَحْرِ وَيَجْتَهِدُ فِي تَحْصِيلِ نَفَقَةٍ حَلَالٍ، فَإِنَّهُ لَا يُقْبَلُ بِالنَّفَقَةِ الْحَرَامِ كَمَا وَرَدَ فِي الْحَدِيثِ، مَعَ أَنَّهُ يَسْقُطُ الْفَرْضُ عَنْهُ مَعَهَا وَلَا تَنَافِي بَيْنَ سُقُوطِهِ، وَعَدَمِ قَبُولِهِ فَلَا يُثَابُ لِعَدَمِ الْقَبُولِ (حاشية ابن عابدين = رد المحتار ط الحلبي – ابن عابدين (٢ ‏/ ٤٥٦)

لہذا خالص اسی روپے سے جو کمیٹی سے لیا ہے حج کرنا جائز نہیں ہاں اگر اس روپے کے ذریعہ تجارت کیا، اور تجارت اس طریقہ پر کی کہ عقد و نقد دونوں مال حرام پر جمع ہوئے یعنی وہی حرام روپیہ دکھا کر سامان تجارت خریدا پھر وہی حرام رو پیہ اس کو دے دیا ، یا پہلے ہی وہ حرام روپیہ دوکاندار کو دے دیا اور اس کے بدلے سامان تجارت خریدا تو وہ مطلقاً حرام و خبیث ہے اس سے تجارت حرام و نا جائز ہے۔ اور اگر عقد و نقد دونوں مال حرام پر جمع نہ ہوئے مثلاً مطلقاً سامان خریدا اور قیمت میں وہی حرام روپیہ دے دیا، یا حرام روپیہ دکھا کر خرید امگر قیمت دیتے وقت دوسرا روپیہ دیا تو وہ خریدا ہوا سامان پاک ہے اور اس سے تجارت کرنا جائز ہے۔ البتہ ایسی تجارت سے احتراز کرنا چاہیے۔ اس لیے اگر زید نے مذکورہ طریقہ جواز کے نہج پر تجارت کی تو اس کے ذریعہ حاصل شدہ آمدنی سے حج کرنا اور والدین کو حج کرانا جائز ہے۔ واللہ تعالی اعلم

الجواب صحیح: محمد نظام الدین رضوی برکاتی

 الجواب صحیح : محمد ابرار احمد امجدی برکاتی

کتبہ: محمد نیاز برکاتی مصباحی

یکم ربیع الاول ۱۴۲۵ھ