کیا تنخواہ یافتہ امام کے پیچھے نماز جائز نہیں ؟

الجواب بعون الملك الوهـــــــــــــــــاب

علمائے متاخرین نے اذان واقامت کی تنخواہ کو ضروتا جائز رکھا ہے۔ فقہ حنفی کی مشہور کتاب تنویر الابصار و درمختار میں ہے : " ويفتى اليوم بصحتها لتعليم القرآن والفقه والامامة والاذان ويجبر المستأجر على دفع ما قبل  فيجب المسمى بعقد " (الدر المختار، ج 6، ص 55، 56، كتاب الإجارة ، باب الاجارة الفاسدة) یعنی قرآن وفقہ کی تعلیم اور امامت و اذان کے لیے فی زماننا اجارے کی صحت پر فتویٰ دیا جاتا ہے تو اُجرت پر رکھنے والا طے شدہ تنخواہ کے دینے پر مجبور کیا جائے گا اور معین مقدار کا دینا اس پر واجب ہوگا۔ لہذا تنخواہ دار امام کے پیچھے نماز بلا کراہت جائز ہے۔ بلکہ تنخواہ دار امام کے ہوتے ہوئے دوسرا شخص آ جائے جو اس سے افضل ہے جب بھی تنخواہ دار امام ہی کی امامت زیادہ بہتر ہے۔ تنویر الابصار و درمختار میں ہے: " إمام المسجد الراتب أولى بالإمامة من غيره مطلقًا " (الدر المختار ، ج 1، ص77، كتاب الصلاة ، باب الامامة)  مسجد كا تنخواہ دار امام اپنے غیر سے مطلقاً امامت کرنے میں اولیٰ ہے۔ علامہ شامی علیہ الرحمہ نے ردالمحتار میں مطلقا کی شرح یوں فرمائی ہے: "أي وإن كان غيره من الحاضرين من هو أعلم وأقرأ منه " (حاشية ابن عابدين ردالمحتار،ج 1،   ص 559، كتاب الصلاة، باب الامامة ) ان عبارات فقہاء سے جب واضح ہو گیا کہ تنخواہ دار امام کے پیچھے نماز بلا کراہت جائز بلکہ بعض اوقات وہی امامت کا زیادہ مستحق ہے تو ایسے امام کے پیچھے نماز نہ پڑھنے سے ترک جماعت کا ارتکاب لازم آئے گا جب کہ جماعت واجب ہے اور جماعت کا بلا عذر شرعی ترک کرنا فسق و گناہ ہے۔

والله اعلم باالصواب و رسوله صلى الله عليه وسلم

کتبہ: محمد عبد الحلیم رضوی اشرفی