سنّی فتویٰ
SUNNI FATWA
THEME
🌿 سبز (روشن)
🌿 سبز (تاریک)
🕋 مکی
🕌 مدنی
🔵 قادری
⚪ چشتی
🟤 رضوی
زید کا کہنا ہے کہ تعزیہ بنانا نا جائز و حرام ہے ، لیکن بکر اس بات کا منکر ہے۔ بکر کا قول ہے کہ تعزیہ بنانا جائز ہے، نیز تعزیہ کے سامنے نذر و نیاز ، شہادت نامہ، مرثیہ پڑھنا، تعزیہ سے عقیدت رکھنا، اس سے مرادیں مانگنا بلا شبہ جائز و مباح ہے۔ بکر یہ بھی کہتا ہے کہ اگر تعزیہ بنانا بدعت اور نا جائز ہوتا تو علماے کرام منع فرماتے۔ دریافت طلب امر یہ ہے کہ قرآن وحدیث کے حوالے سے مدلل جواب سے نوازیں کہ بکر کا قول درست ہے یا زید کا؟ نیز یہ بھی تحریر فرمائیں کہ جاری گانا باجے کے ساتھ کیسا ہے ؟
صدر الدین صدیقی، مقام لکور ہی، ارجن ڈومری، دیوریا، یوپی
زید کا قول صحیح ہے۔ تعزیہ بنانا، اسے گلی گلی گھمانا، چوک پر رکھنا، تعزیے کے پاس شیرینی لے جاکر نیاز و فاتحہ کرنا، تعزیے سے منت مانگنا، یہ سب حرام و گناہ ہے۔ علما نے عوام کو ہمیشہ تعزیہ داری سے منع فرمایا۔ مجددا عظم اعلیٰ حضرت قدس سرہ کے اس سلسلے میں کثیر فتاوی ہیں اور ایک رسالہ بھی ہے جو بارہا چھپ چکا ہے ، جس کا نام ”رسالہ تعزیہ داری “ ہے۔ علاوہ ازیں علماے اہل سنت کے متعدد پوسٹر بھی تعزیہ کے خلاف شائع ہو چکے ہیں، عوام نہ مانیں تو اس کا علاج علما کے پاس کیا ہے؟ واللہ تعالیٰ اعلم
جاری کیا چیز ہے ، یہ سمجھ میں نہیں آیا۔
گانا با جا بہر حال حرام ہے۔ حدیث میں ہے کہ حضور اقدس ﷺنے فرمایا :
أمرني ربي بمحق المعازف . (مسند الإمام أحمد بن حنبل، ج : ٣٦ ، ص: ٦٤٦ ، حدیث ابی امامه باهلي، مؤسسة الرسالة، بيروت)
مجھے میرے رب نے باجوں کے مٹانے کا حکم دیا۔ واللہ تعالیٰ اعلم
۲۰ /صفر ۱۴۱۵ھ
⚠️ نوٹ: شیئر کارڈ میں اردو کے علاوہ دوسری زبان میں تصویر صحیح نہیں آتی، براہِ کرم پی ڈی ایف ڈاؤن لوڈ کیجئے۔
