وہابی خیالات کے حامل امام کی اقتدا کا حکم

الجواب بعون الملك الوهـــــــــــــــاب

مرتد وہ شخص ہے جو اسلام کے بعد کسی ایسے امر کا انکار کر دے جو ضروریات دین میں سے ہو، یعنی زبان سے کلمۂ کفر بکے جس میں صحیح تاویل کی گنجائش نہ ہو۔ مولوی اشرف علی تھانوی نے حضور سرکار دو عالم صلی اللہ علیہ وسلم  کی جناب میں گستاخی کی ہے اور نبی کریم صلی اللہ علیہ وسلم  کے علم پاک کو گدھوں ، جانوروں اور چوپایوں سے تشبیہ دے کر اپنے اوپر کفر کو لازم کر لیا ہے۔ چناں چہ اس نے اپنی کتاب حفظ الایمان ص: ۸ پر لکھا ہے:  ” آپ کی ذات مقدسہ پر علم غیب کا حکم کیا جانا اگر بقول زید صحیح  ہے تو دریافت طلب یہ امر ہے کہ اس غیب سے مراد کل غیب ہے یا بعض غیب ، اگر بعض علوم غیبیہ مراد ہیں تو اس میں حضور ہی کی کیا تخصیص ہے ایسا علم غیب تو ہر زید و عمر (یعنی عام لوگ ) بلکہ ہر صبی و مجنوں ( بچہ  و پاگل ) بلکہ جمیع حیوانات و بہائم کو بھی حاصل ہے۔"  خط کشیدہ عبارت میں علمائے حرمین شریفین زاد اللہ شرفہما کی خدمت میں پیش کی گئی۔ علمائے حرمین طیبین نے بالا تفاق اس عبارت اور اس عبارت مذکورہ بالا کے لکھنے والے مولوی اشرف علی تھانوی پر کفر کا فتوی صادر فرمایا ۔ مولوی اشر ف علی تھانوی بارگاہ نبوت میں ایسی گستاخی کرنے کے سبب بلا شبہ کا فر ہو گیا۔ بقولہ تعالیٰ: " لَا تَعْتَذِرُوْا قَدْ كَفَرْتُمْ بَعْدَ اِیْمَانِكُمْ" (التوبة: 66) اب تم بہانے نہ بناؤ ایمان لانے کے بعد بے شک تم کافر ہو گئے ۔ لہذا جان بوجھ کر مولوی اشرف علی تھانوی کے کفر میں یا اس کے عذاب میں شک کرنا بھی کفر ہے بقول العلما الاعلام: " من شك في كفره و عذابه بعد اطلاعه فقد کفر "  (حسام الحرمین ص: 134)

 خطیب مسجد کا یہ کہنا کہ کافر کو بھی کافر نہیں کہا جا سکتا قطعاً جھوٹ اور شریعت اسلامیہ پر افتراء ہے۔ خود اللہ رب العزت جل جلالہ و عم نوالہ حکم فرماتا ہے: " قُلْ یٰۤاَیُّهَا الْكٰفِرُوْنَ" ( الکافرون : 1) تم کہو ! اے کا فرو! ۔ خدائے ذوالجلال کا فر کو کافر کہنے کا حکم دے رہا ہے اور خطیب مسجد کہتا ہے کہ کافر کو کافر نہیں کہا جا سکتا، یہ حکم خداوندی کی سراسر خلاف ورزی اور فرمان الٰہی سے کھلی بغاوت ہے۔

بے نمازی کو کافر نہیں کہا جا سکتا کہ یہ بے عمل ہے اور بے عملی فسق ہے کفر نہیں ۔ ہاں اگر نماز کی فرضیت کا انکار کرے تو بلا شبہ وہ کافر ہو جائے گا۔ کیوں کہ فرض قطعی کا منکر کھلا کافر ہے۔ اسی طرح بارگاہ نبوت کا گستاخ بھی کافر ہے۔ خطیب مسجد کا ایسا جملہ کہنا اس کی بد عقیدگی کا کھلا ثبوت ہے۔ ایسے شخص کے پیچھے نماز پڑھنا حرام اور اس کو امامت سے معزول کرنا واجب وضروری ہے۔

والله اعلم باالصواب و رسوله صلى الله عليه وسلم

کتبہ: محمد عبد الحلیم رضوی اشرفی

جامعہ عربیہ اسلامیہ ناگپور،۴ ربیع الاول ۱۳۹۲ھ