طوافِ زیارت نہ کرنے پر عورت کے لیے وطی کا حکم

جناب محترمی و معظمی مفتی صاحب مدظلہ العالی دار الافتاء جامعہ عربیہ اسلامیہ ناگپور السلام علیکم ورحمۃ اللہ

 کیا فرماتے ہیں علمائے دین و مفتیان شرع متین اس مسئلہ میں ۔۔۔۔

جو نشیمن اخبار مورخہ ۱۷ جون ۱۹۷۳ ء میں مغل لائن بمبئی سے ”چند گزارشات“ کے عنوان کے تحت شائع ہوا ہے اس کی عبارت یوں ہے  ”دوسری اور اہم قابل توجہ شکایت جس پر مغل لائن کے ذمہ داروں و حج کمیٹی کے ارکان کو فوراً غور کرنا ہے وہ یہ ہے کہ رمضان سے پہلے جانے والی مستورات جن کی عمریں ۴۵ سال سے کم ہوں ان کی ایام ماہواری اگر ایام حج ۱۲/۱۱/۱۰/۹/۸/ذوالحجہ کو پڑتے ہوں تو وہ پہلے جہاز سے واپس نہ ہوں بلکہ دوسرے یا تیسرے جہاز سے واپس ہوں، کیوں کہ بعض اوقات جہاز اس قدر جلدی روانہ ہوتے ہیں کہ ایسی عورتیں ابھی ایام سے فارغ بھی نہیں ہوتیں کہ روانگی کی تاریخ آجاتی ہے اس طرح طوافِ زیارت جو مناسک حج میں داخل ہے باقی رہ جانے سے وہ شوہروں پر حرام ہو جاتی ہیں تا وقتیکہ یہ فرض ادا نہ ہو جائے ضرورت ہے کہ مغل لائن اور حج کمیٹی والے کوئی ایسا انتظام کریں جس سے مشکل دور ہو۔“

دریافت طلب امر یہ ہے کہ مذکورہ بالا صورت اگر فی الحقیقت واقع ہو گئی یعنی جہاز کی مقررہ تاریخ پر واپس ہونا کسی حائضہ عورت کے لیے ناگزیر ہو گیا اور طواف زیارت نہ کر سکی تو حج میں نقص واقع ہو گا اور وہ اپنے خاوند کے لیے حرام کیوں ہوگی؟ اس کی تشریح اور تفصیل از روئے شریعت مطلوب ہے۔ برائے کرم مطلع فرماکر ممنون و مشکور فرمائیں۔ جواب کے لیے لفافہ ارسال خدمت ہے۔