یہ کہنا کیسا ہے کہ نظم کائنات دائمی و ابدی ہے؟

قائل نظم کا ئنات کو ابدی کہتا ہے نہ کائنات کو۔ کائنات کو نہ اس نے ابدی و دائمی بتایا نہ اس کے کسی لفظ سے یہ مترشح۔  نظم کائنات سے اس کا یہ مطلب نہیں کہ یہ نظام دنیا ابدی ہے، یوں یہ ابد الآباد تک رہے گا، بلکہ نظم کائنات اس نے انہیں اصول کا نام رکھا جن پر نظام کائنات برقرار ہے ، جن پر نظام کائنات کا مدار ہے۔ رہا یہ کہ کن اصول کو وہ دائمی و مستحکم و ابدی کہتا ہے، یہ اس عبارت میں نہیں ، وہ بھی منقول ہوتے تو ان کا حکم بتایا جاتا مگر ایسے اصول ہیں جنہیں ابدی کہہ سکتے ہیں بلکہ وہ بھی جواز لی بھی ہے، اور ابدی بھی، ہمیشہ سے ہے اور ابدالآباد تک رہے گا ، وہ اصل کیا ہے : لا اله الا اللہ جس پر نظام کا ئنات کا مدار ہے کہ

﴿  لَوْ كَانَ فِیْهِمَاۤ اٰلِهَةٌ اِلَّا اللّٰهُ لَفَسَدَتَاۚ   ﴾ترجمہ: اگر زمین و آسمان میں اللہ کے علاوہ چند معبود ہوتے تو زمین و آسمان بر باد ہو جاتے ۔[پارہ:17،سورةُ الانبياء: 22]

اور یوں بھی کہ جب عالم میں کوئی : لا اله إلا الله محمد رسول اللہ کہنے والا باقی نہ رہے گا جب ہی قیامت قائم ہوگی ، اور یہ نظام عالم درہم برہم اور عالم تہ و بالا اور نیست ونابود ہو جائے گا۔ فنا کی گھاٹ اتر جائے گا۔ تو اسے ابدی و دائمی کہنے میں کیا حرج کہ قطعاً ابدی دائمی ہے۔ اصول کے دائمی وابدی ہونے سے عالم و نظام عالم و ابدی و دائمی نہ ہو جائیں گے۔

والله تعالى أعلم وعلمه جل مجده أتم وأحكم