رسل بشر کی جو تعریف کی جاتی ہے کیا وہی تعریف رسل ملائکہ کی بھی ہے

نبی اور رسول کے بارے میں علما کے تین اقوال ہیں ۔ دونوں مرادف ہیں۔ نبی عام ہے اور رسول خاص ہے۔ مطلقاً نبی اور رسول میں عموم خصوص مطلق کی نسبت ہے۔ جولوگ تساوی کے قائل ہیں وہ نبی کی یہ تعریف کرتے ہیں ، جس کی جانب وحی کی جائے ، اور وحی سے مراد شرعی ہے لغوی نہیں ، اور جو لوگ عام خاص مطلق مانتے ہیں وہ رسول کی تعریف میں کتاب اور بعض شرع جدید کی قید لگاتے ہیں۔ اور نبی کو انسان کے ساتھ خاص کرتے ہیں اور جو عموم خصوص مطلق مانتے ہیں ۔ وہ نبی کی تعریف یہ کرتے ہیں وہ بشر جس کی جانب وحی کی گئی ہو اور رسول وہ ہے جو مامور بالتبلیغ ہو عام اس سے کہ بشر ہو یا نہ ہو۔ اس تقدیر پر ملائکہ میں جو رسول ہیں وہ شرعی معنی کے لحاظ سے ہیں ۔ اس کو المعتقد المنتقد میں راجح فرمایا ۔  البتہ بہار شریعت کے مطالعہ سے ایک قول کا اور پتہ چلا ۔ بہار شریعت میں فرمایا : نبی اس بشر کو کہتے ہیں جسے اللہ تعالیٰ نے ہدایت کے لیے وحی بھیجی ہو اور رسول بشر ہی کے ساتھ خاص نہیں بلکہ ملائکہ میں بھی رسول ہیں۔ اس سے بظاہر متبادر ہوتا ہے کہ رسول عام ہے اور نبی خاص لیکن مجھے کہیں اس کی تفصیل نہیں ملی ۔ ویسے اس کو تیسرے قول کی طرف راجع کیا جا سکتا ہے۔ واللہ تعالیٰ اعلم ۔