اگر امام کو ایسا عذر لاحق ہو جو واجب یا کم از کم سنت مؤکدہ کے ترک کا سبب بنے تو یہ مانع امامت ہے

 ذو المجد والكرم مفتی صاحب قبلہ زید مجد کم جامعہ عربیہ ناگپور السلام علیکم ورحمۃ اللہ وبرکاتہ دست بستہ التماس یہ ہے کہ استفتاء ذیل کا جواب مرحمت فرما کر ممنون فرمائیں۔

یہاں کی سنی مسجد میں ایک صالح حافظ قرآن ، صحیح العقائد تقریباً بائیس سال سے فرائض امامت ادا کرتے رہے۔ تقریباً چھ ماہ سے انہیں وجع المفاصل کا عارضہ لاحق ہو گیا ۔ جس سے ارکان نماز ادا کرنے میں مختصر سا فرق آگیا۔ کیوں کہ حافظ صاحب ۶۸  سال کی عمر کے ہو چکے ہیں۔ انہوں نے از خود متولی صاحب سے بغرض علاج دو ماہ کی رخصت لے لی اور اپنی جگہ پر ایک مستند قابل عالم فاضل کو دو ماہ کے لیے مقرر کر دیا۔ اب دو ماہ ختم ہونے کو آئے علاج و معالجہ بہت کیا بڑے بڑے ہسپتالوں میں ایکسرا کرا کر دوائیاں لے آئے ۔ یونانی ، آیور ویدک علاج بھی کرایا مگر مرض میں تخفیف کے آثار نظر نہ آئے ۔ حافظ صاحب کثیر العیال اور غریب ہیں مسجد کی تنخواہ پر گزر اوقات ہوتی تھی ، مسجد کی آمدنی محدود ہے۔ پینشن ہو نہیں سکتی۔ اندریں صورت مذکورہ عذر، عذر شرعی تصور ہوگا یا نہیں؟ یا امام صاحب از خود سبک دوش ہو جائیں ، نماز کا معاملہ ہے، کیا حافظ صاحب رخصت ختم ہونے پر دوبارہ فرائض امامت ادا کر سکتے ہیں یا نہیں؟ بینوا وتوجروا