لاؤڈ اسپیکر پر نماز کا حکم

الجواب بعون الملك الوهـــــــــــــاب

لاؤڈ اسپیکر پر امام کی اپنی نماز تو ہو جائے گی مقتدیوں کی نہ ہوگی ۔ لاؤڈ اسپیکر نہ تو مکبر ہے جس کی آواز پر رکوع وسجود کیے جائیں اور نہ امام جس کی آواز سن کر اقتدا کی جائے بلکہ اس کی آواز صدائے بازگشت ہے جو جنگلوں اور پہاڑوں وغیرہ سے از خود یا کسی آواز دینے والے کی آواز پر جواباً آتی ہے۔ فقہا نے صدائے بازگشت کا اعتبار نہیں کیا۔ مراقی الفلاح  وغیرہ میں ہے: ولا تجب بسماعها من الصدى، وهو ما يجيب مثل صوتك في الجبال والصحاري ونحوه (مراقي الفلاح شرح متن نور الإيضاح، ج 1، ص 186، کتاب الصلاة،  باب سجود التلاوة ) اور طحطاوی علی مراقی الفلاح میں ہے: الصوت الذي يسمعه المصوت عقب صياحه راجعا إليه من جبل أو بناء مرتفع  فإنه لا إجابة في الصدى وإنما هو محاكاة ( حاشية الطحطاوي على مراقي الفلاح شرح نور الإيضاح، ج 1، ص 486،  کتاب الصلاة،  باب سجود التلاوة، دار الكتب العلمية بيروت) یعنی اگر پہاڑوں اور جنگلوں سے آیت سجدہ کی آواز آئے تو اس آواز پر سجدہ تلاوت واجب نہیں چوں کہ نہ اس میں اہلیت ہے اور نہ بعینہ تالی کی آواز ہے بلکہ یہ ایک حکایت اور نقل ہے۔ اگر اس زمانے کے بعض علما کسی مصلحت کی بنیاد پر نہیں روکتے تو اس سے اسلامی قانون نہیں بدل سکتا ۔ فقط

والله اعلم باالصواب و رسوله صلى الله عليه وسلم

کتبہ: محمد عبد الحلیم رضوی اشرفی

جامعہ عربیہ اسلامیہ ناگپور، ۲۱ جمادی الاولی ۱۳۹۲ھ