جس محفل میں پابند شرع اور فاسق دونوں ہی ہوں اس مجلس میں سلام کرنا کیسا ؟

الجواب بعون الملك الوهـــاب

جس محفل میں کچھ لوگ پابند شرع اور کچھ لوگ بے نمازی داڑھی منڈے بیٹھے ہوں وہاں آنے والے کو سلام کرنے میں کوئی حرج نہیں ۔ البتہ صرف فاسق معلن کو سلام کرنے میں سبقت کرنا مکروہ ہے۔ ” يُكْرَهُ السَّلَامُ عَلَى الْفَاسِقِ لَوْ مُعْلِنًا وَإِلَّا لَا “ یعنی فاسق معلن کو سلام کرنا مکروہ ہے اور اگر فاسق معلن نہیں ہے تو مکروہ نہیں۔ ردالمحتار میں ”لَوْ مُعْلِنًا“ کی شرح میں یوں ارشاد ہے: ”وَلَا عَلَى الْفَاسِقِ الْمُعْلِنِ“(رد المحتار- ابن عابدين (ت ١٢٥٢)، ج 1، ص 617، كتاب الصلاة، باب ما يفسد الصلاة وما يكره فيها، دار الفكر - بيروت) فاسق معلن کو سلام نہ کرے۔ بے نمازی اور داڑھی منڈے فاسق معلن ہیں مشرک نہیں ۔ فاسق مسلمان ہے مگر مشرک مسلمان نہیں۔ فاسقِ معلن کو بطورِ ایذا رسانی مشرک کہنا حرام اور عقیدتا مشرک کہنا کفر ہے۔ عقید تا مشرک کہنے والے پر تو بہ وتجدید ایمان ضروری ہے۔ اور اگر عقید تا نہ کہا جب تو بہ کرے اور معافی مانگے ۔

والله اعلم باالصواب و رسوله صلى الله عليه وسلم