پیشانی پرنشانِ سجدہ کا حکم

الجواب بعون الملك الوهـــاب

اس بارے میں تحقیق یہ ہے کہ دکھاوے کے لیے قصدًانشان پیدا کرنا حرام و گناہ کبیرہ ہے اور وہ نشانی استحقاقِ جہنم کا نشان ہے۔ پس ایسے شخص کی سیاہ پیشانی سیاہ قلبی پر دلالت کرتی ہے۔ اور اگر کثرت سجود کے سبب وہ نشانی پڑ گئی تو اگر اس سے مقصو دریا اور دکھاوا تھا تو یقیناً ایسا کرنے والا مستحق نار ہے ۔ لیکن اگر ریا مقصود نہیں بلکہ خالصاً لوجہ اللہ کثرت سجود کے سبب نشان پڑ گیا اور اس کی توجہ ریا کی طرف قطعا نہیں تو یہ نشان مذموم نہیں بلکہ محمود ہے۔ ریا کا تعلق نیت سے ہے اور نیت کا حال اللہ تعالیٰ کو معلوم ہے۔ اس لیے ہم اس پر ریا کاری کا حکم نہیں لگا سکتے، جب تک کسی دلیل خارجی سے اس کا ریا کار ہونا ثابت نہ ہو جائے ۔ ایک جماعت کے کے نزد یک آیت کریمہ میں اس کی تعریف موجود ہے امید ہے کہ قبر میں فرشتوں کے لیے اس کے ایمان و نماز کی نشانی ہو، اور قیامت کے دن یہ نشان آفتاب سے زیادہ نورانی ہو بشرطیکہ عقیدہ اہلِ سنت و جماعت کے مطابق ہو ورنہ بد مذہب کی کسی عبادت پر نظر نہیں ہوتی۔ ابن ماجہ کی حدیث سے جس کا مفہوم یہی ہے کہ ”حضور  صلی اللہ علیہ وسلم  نے اس دھبے کو خارجیوں کی علامت قرار دی ہے۔“ حاصل تحریر یہ ہے کہ اگر وہ نشان بد مذہب میں ہے تو مذموم اور سنی صحیح العقیدہ میں اگر ریا کے لیے ہے تو مذموم اور اگر ریا سے پاک ہے تو محمود ”سِیْمَاهُمْ فِیْ وُجُوْهِهِمْ مِّنْ اَثَرِ السُّجُوْدِ“ ان کی نشانی ان کے چہروں میں ہے سجدے کے اثر سے۔ اس نشانی سے مراد وہ نور ہے جو سجدے کی برکت سے قیامت میں اس سے چہرے منور ہوں گے۔ حدیث میں ہے: عَنْ أُبَيِّ بْنِ كَعْبٍ رضی الله عنه  قَالَ: قَالَ رَسُولُ الله ﷺ ﴿ سِیْمَاهُمْ فِیْ وُجُوْهِهِمْ مِّنْ اَثَرِ السُّجُوْدِ﴾ [الفتح: 29] قَالَ: النُّورُ يَوْمَ الْقِيَامَةِ۔  (المعجم الأوسط للطبراني – الطبراني (ت ٣٦٠)، ج 4، ص 371، باب العين، من اسمه عبد الله، دار الحرمين - القاهرة)  یعنی رسول اللہ صلی اللہ علیہ وسلم نے اس نشان کو سجود کی تفصیل میں فرمایا کہ وہ چہروں کا نور مراد ہے۔ بہر حال مقرر صاحب کو ہر ایک کے لیے نشان سجدہ کو سیاہ قلبی پر محمول نہیں کرنا چاہیے، یہ ان کے لیے ہے جو بد مذہب و بد عقیدہ ہیں۔ ورنہ متقدمین و متاخرین میں بہت سے ایسے اولیائے کاملین و علمائے عارفین گزرے ہیں جن کی پیشانی پر نشانِ سجدہ موجود تھے۔

والله اعلم باالصواب و رسوله صلى الله عليه وسلم