مسلمان خصوصاً عالم دین کی توہین کرنے والے کا حکم

 عالم تو عالم، کسی عام مسلمان کو ذلیل کرنا اور اس کی توہین کرنا حرام ہے۔ حدیث میں ارشاد فرمایا: ”مَنْ آذى مسلمًا فقدْ آذانِي، و مَنْ آذاني فقدْ آذى اللهَ۔“ (المعجم الصغير للطبراني، باب السين، ج: 1، ص: 284، المكتب الإسلامي، بيروت)

ترجمہ: ”جس نے کسی مسلم کو ایذا دی، اس نے مجھے ایذا دی، اور جس نے مجھے اذیت پہنچائی، اس نے اللہ عزوجل کو اذیت دی۔“

​یہ حکم عام مسلمانوں کو ذلیل و رسوا کرنے کا ہے، اور عالمِ دین چونکہ مذہبی پیشوا و مقتدا ہے، اس کو ذلیل کرنا اور زیادہ اشد ہوگا۔ بلکہ بعض علماء نے ایسے شخص کی تکفیر فرمائی ہے۔ 'حدیقہ ندیہ شرح طریقہ محمدیہ' میں ہے: ”من قال لعالم عويلم یکفر“ (جو کسی عالم کو ملاٹا یا مولویا کہے وہ کافر ہو جائے گا)۔ جب صیغۂ تصغیر سے پکارنے کا یہ حکم ہے، تو مارنے میں بدرجہ اولیٰ تذلیل و تحقیر ہے۔

​بے شک ایسے لوگ جنہوں نے عالمِ دین کی توہین کی ہے، ضرور ایسے ہیں کہ ان سے مقاطعہ کیا جائے، اور جب تک توبہ نہ کریں اور اس عالم سے معافی نہ چاہیں، اس وقت تک بدستور مقاطعہ جاری رکھا جائے۔ اور امام کا پہلے ان کی نسبت ایسے احکام جاری کرنا، پھر ہمسائیگی و قرابت وغیرہ کے خیال سے ایسے فساق و فجار کی حمایت کرنا اور ان کے ساتھ مواکلت و مشاربت کرنا، احکامِ شرعیہ سے بے پرواہی، سخت بے باکی، کبیرہ گناہ اور فسق ہے۔ اور یہ ایسا امر ہے کہ اس کی وجہ سے بنی اسرائیل کے علماء پر اللہ عزوجل کی لعنت اتری، اور انہیں فاسق بتایا گیا اور ایمان سے خالی ہونا بیان کیا گیا۔

​سنن ابن ماجہ میں بروایت عبداللہ ابن مسعود رضی اللہ تعالیٰ عنہ مروی ہے کہ حضور اقدس صلی اللہ تعالیٰ علیہ وسلم نے فرمایا: «إِنَّ بَنِي إِسْرَائِيلَ لَمَّا وَقَعَ فِيهِمُ النَّقْصُ، كَانَ الرَّجُلُ يَرَى أَخَاهُ عَلَى الذَّنْبِ فَيَنْهَاهُ عَنْهُ، فَإِذَا كَانَ الْغَدُ لَمْ يَمْنَعْهُ مَا رَأَى مِنْهُ، أَنْ يَكُونَ أَكِيلَهُ وَشَرِيبَهُ وَخَلِيطَهُ، فَضَرَبَ الله قُلُوبَ بَعْضِهِمْ بِبَعْضٍ، وَنَزَلَ فِيهِمُ الْقُرْآنُ، فَقَالَ: ﴿لُعِنَ الَّذِیْنَ كَفَرُوْا مِنْۢ بَنِیْۤ اِسْرَآءِیْلَ عَلٰى لِسَانِ دَاوٗدَ وَ عِیْسَى ابْنِ مَرْیَمَؕ﴾ حَتَّى بَلَغَ ﴿وَ لَوْ كَانُوْا یُؤْمِنُوْنَ بِاللّٰهِ وَ النَّبِیِّ وَ مَاۤ اُنْزِلَ اِلَیْهِ مَا اتَّخَذُوْهُمْ اَوْلِیَآءَ وَ لٰكِنَّ كَثِیْرًا مِّنْهُمْ فٰسِقُوْنَ(۸۱) ﴾ [المائدة: ٨١]»، قَالَ: وَكَانَ رَسُولُ الله ﷺ، مُتَّكِئًا فَجَلَسَ، وَقَالَ: «لَا حَتَّى تَأْخُذُوا عَلَى يَدَيِ الظَّالِمِ، فَتَأْطِرُوهُ عَلَى الْحَقِّ أَطْرًا» (سنن ابن ماجه، باب الأمر بالمعروف والنهي عن المنكر، ج: 2، ص: 327، حدیث: 4006، دار إحياء الكتب العربية)