مسجد حرام کی باہر سے طواف کرنا کیسا ہے ؟

الجواب بعون الملک الوھاب

 (1) کعبہ معظمہ کا طواف مسجد حرام شریف کے اندر ہی سے کرنا ہوگا۔ اگر مسجد حرام کے باہر سے طواف کیا جائے تو نہ ہوگا ۔

درمختار مع رد المحتار ج: ۳ ،ص ۴۵۱ میں ہے: وَاعْلَمْ أَنَّ مَكَانَ الطَّوَافِ دَاخِلَ الْمَسْجِدِ وَلَوْ وَرَاءَ زَمْزَمَ لَا خَارِجَهُ لِصَيْرُورَتِهِ طَائِفًا بِالْمَسْجِدِ لَا بِالْبَيْتِ

طواف کی جگہ مسجد حرام کا داخلی حصہ ہے، چاہے زمزم شریف کے پیچھے سے ہی کیوں نہ ہو ؛کیوں کہ زمزم کعبہ معظمہ کا تو نہیں لیکن مسجد حرام کا حصہ ہے۔

(2)  حج فرض یا نفلی میں طواف قدوم کے بعد سعی کرلیا تو پھر سعی کی ضرورت نہیں ۔ ہاں ! مفرد کے لیے حج فرض یا طواف قدوم کے بعد سعی نہ کرناافضل ہے۔

 فتاوی عالمگیری ج: 1 ص 291 میں ہے: الْمُفْرِدُ بِالْحَجِّ إذَا أَتَى بِطَوَافِ الْقُدُومِ فَالْأَفْضَلُ أَنْ لَا يَسْعَى بَعْدَهُ وَلَكِنْ يَسْعَى بَعْدَ طَوَافِ الزِّيَارَةِ.

حج افراد کرنے والا جب طواف قدوم کرے تو اس کے لیے افضل یہ ہے کہ طواف قدوم کے بعد سعی نہ کرے، بلکہ طواف زیارت کے بعد کرے۔ واللہ تعالیٰ اعلم