کفار کے ميلوں میں جانے سے کیا آدمی کافر ہو جاتا ہے ؟

کافروں کے میلے میں جانے سے آدمی کافر نہیں ہوتا کہ عورت نکاح سے نکل جائے، جو لوگ ایسے فتوے دیتے ہیں شریعتِ مطہرہ پر افتراء کرتے ہیں، البتہ اس میں شریک ہونا مسلمان کو منع ہے۔

حدیث میں ہے: من كثر سواد قوم فهو منهم — (كنز العمال في سنن الأقوال والأفعال - ط الرسالة – المتقي الهندي (٩ ‏/ ٢٢)

ترجمہ: جس شخص نے کسی قوم کی جماعتی تعداد میں اضافہ کیا تو وہ انہی میں سے ہے۔ (ت)

دوسری حدیث میں ہے:  مَنْ جَامَعَ الْمُشْرِكَ وَسَكَنَ مَعَهُ فَإِنَّهُ مِثْلُهُ — (سنن أبي داود - ت محيي الدين عبد الحميد – أبو داود (٣ ‏/ ٩٣)

ترجمہ: جو کوئی کسی مشرک کے ساتھ جمع ہوا اور اس کے ساتھ ٹھہرا تو بیشک وہ اسی مشرک کی طرح ہے۔ (ت)

علماء فرماتے ہیں مسلمان کو چاہئے کہ مجمعِ کفار پر ہو کر نہ گزرے کہ ان پر لعنت اترتی ہے، اور ظاہر کہ ان کا میلہ صدہا کفر کے شعار اور شرک کی باتوں پر مشتمل ہوگا، اور یہ ممانعت و ازالۂ منکر پر قادر نہ ہو گا تو خواہی نخواہی گونگا شیطان اور کافر کا تابعدار ہو کر مجمعِ کفار میں رہنا اور ان کے کفریات کو دیکھنا، سننا مسلمان کی ذلت ہے، اور کافر کی نوکری مسلمان کے لئے وہی جائز ہے جس میں اسلام و مسلم کی ذلت نہ ہو۔ نص عليه العلماء کما فی الغمز وغیرہ (علماء کرام نے اس کی تصریح فرمائی، جیسا کہ الغمز وغیرہ میں مذکور ہے۔ ت) رزق اللہ کے ذمہ ہے اور اس کے راستے کھلے ہوئے، تو عذرِ مجبوری غلط ہے۔ واللہ تعالی اعلم وعلمہ جل مجدہ اتم واحکم (اور اللہ تعالی سب کچھ اچھی طرح جانتا ہے اور اس بزرگ و عظیم ذات کا علم بڑا کامل اور زیادہ محکم ہے۔ ت)