کافروں کے بچے کی نماز جنازہ و تدفین کا حکم

الجواب بعون الملك الوهـــــــــــــاب

کفار کے بچے احکام دنیا میں اپنے ماں باپ کے تابع ہیں۔ شامی میں ہے:  بَلْ هُوَ تَابِعٌ لِأَحَدِ أَبَوَيْهِ إلَى الْبُلُوغِ مَا لَمْ يُحْدِثْ إسْلَامًا وَهُوَ مُمَيِّزٌ  (رد المحتار، ج 2، ص 229، كتاب الصلاة، باب صلاة الجنازة) یعنی بچہ اپنے ماں باپ میں سے ایک کے تابع ہے۔ ہاں اگر وہ سمجھ والا ہے اور اسلام لے آیا تو البتہ اس پر احکام اسلام دنیا میں جاری ہوں گے۔ در مختار میں ہے : لَا يُصَلَّى عَلَيْهِ لِأَنَّهُ تَبَعٌ لَهُ أَيْ فِي أَحْكَامِ الدُّنْيَا لَا الْعُقْبَى، لِمَا مَرَّ أَنَّهُمْ خَدَمُ أَهْلِ الْجَنَّةِ. (رد المحتار، ج 2، ص 229، كتاب الصلاة، باب صلاة الجنازة)  یعنی کافر کے بچے کی نماز جنازہ نہیں پڑھی جائے گی اس لیے کہ وہ احکام دنیا میں اپنے ماں باپ کے تابع ہے۔ ہاں آخرت میں اہلِ جنت کے خادم ہوں گے۔ ان عبارت مذکورہ بالا سے واضح ہو گیا کہ اس بچے کی نہ نماز جنازہ پڑھی جائے گی اور نہ مسلمان کے قبرستان میں دفن کیا جائے گا بلکہ اس کو علیحدہ دفن کیا جائے گا۔

والله اعلم باالصواب و رسوله صلى الله عليه وسلم