نبی علیہ السلام کس کے نور سے پیدا ہوئے؟

 بلا شبہ حضور نبی اکرم صلی الله تعالٰی علیہ وسلم الله تعالیٰ کے نور سے ہیں بلا کیف و تقسیم حضور نبی کریم صلی الله تعالٰی علیہ وسلم نے خود حضرت جابر رضی الله تعالیٰ سے فرمایا:  یَا جَابِرُ اِنَّ اﷲ َ تَعَالیٰ خَلَقَ نُوْرَ نَبِیِّکَ مِنْ نُوْرِہٖ   یعنی  اے جابر رضی الله تعالیٰ عنہ بیشک الله تعالیٰ نے تیرے نبی کے نور کو اپنے نور سے پیدا فرمایا، دیکھئے حضور نبی کریم تو خود فرمارہے ہیں، کہ الله تعالیٰ نے اپنے نبی کے نور کو اپنے نور سے پیدا فرمایا۔ اور سوال میں کھلم کھلا مخالفت کی گئی ہے، سوال میں کہ الله تعالیٰ نے اپنے نبی کے نور کو اپنے نور سے پیدا نہیں فرمایا، بلکہ غیر کے نور سے پیدا فرمایا، تو سائل ذرا یہ تو بتائے کہ وه غیر  کون ہے، کہ جس کے نور سے الله تعالیٰ نے اپنے نبی کے نور کو پیدا فرمایا ، سوال کرنے والا بیچاره اس حدیث کو سمجھا ہی نہیں ہے، اور خود ایسی بات کر دی ہے جو بے سند ہے، ہمارے نبی علیہ الصلوٰة والسلام کی ذات الله تعالٰی کی ذات کی مظہر اتم ہے، اور ہمارے نبی علیہ الصلوٰة والسلام کا نور ذاتی بایں وجہ ہے، کہ بغیر وسیلہ کے منسوب بسوئے واجب ہے، اور چیزوں کی نسبت الله تعالیٰ کی ذات کی طرف ہمارے نبی علیہ الصلوٰة والسلام کے وسیلہ سے ہے، مگر حضور علیہ الصلوٰة والسلام بغیر وسیلہ کے ذات واجب کی طرف منسوب ہیں یا یہ معنی ہیں کہ نبی پاک صلی الله تعالٰی علیہ وسلم نور مجسم ہیں مخلوق ہیں، اصل نور آپ ہی ہیں، اور باقی انوار آپ کی فروع ہیں آپ بلا شبہ نور الانوارہیں صلی الله تعالی علیہ وسلم ۔

خلاصہ اس امر کا یہ ہے، کہ الله تعالی نے اپنے نبی کے نور کو بلا تقسیم و کیف اپنے نور سے پیدا فرمایا  اور باقی مخلوق کو اپنے نبی کے نور سے پیدا فرمایا، جیسا کہ کتب روایات میں اس کی تصریح ہے، یہاں تک کہ بعض دیوبندی مولویوں نے بھی بعض (دیکھو نشر الطیب و عطر الورده) رسائل میں اس کی تصریح کی ہے کہ الله تعالیٰ نے اپنے نبی کے نور کو اپنے نور سے پیدا فرمایا، یہ مضمون ایک لحاظ سے متشابہات سے ہے، اس کے یقینا یہ معنی نہیں کہ الله تعالی کی ذات سے کوئی چیز علیحده ہوئی کیونکہ ذات مقدسہ باری تعالیٰ کم و کیف مقدار و تقسیم سے جسم سے جسمانیات سے ترتیب سے انحلال سے عوارض حدوث و امکان سے منزه و پاک ہے، الله تعالٰی بصیرت دے اور حق کہنے اور حق پر  عمل کرنے کی توفیق عطا فرمائے۔   والله تعالی و رسولہ الا علیٰ اعلم۔