قبر پر اذان دینا کیسا ؟

الجواب بعون الملك الوهــــــــــــــــــاب

قبر پر اذان دینا میت کو تلقین کرنا ہے۔ تلقین موتی کا ثبوت بہت سی حدیثوں سے ملتا ہے۔ مشکوۃ شریف میں ہے: وعن أبي سعيد وأبي هريرة رضي الله عنهما قالا : قَالَ رَسُولُ الله صَلَّى الله عَلَيْهِ وَسَلَّمَ: " لَقِّنُوا مَوْتَاكُمْ لَا إِلَهَ إِلَّا الله ". (رواه مسلم) (مشكاة المصابيح،  ج:1 ، ص: 508، کتاب الجنائز/ صحيح مسلم، ج 2، ص 631، كتاب الجنائز، باب تلقين الموتى لا إله إلا الله، الحدیث : 916) حضرت ابوسعید و ابو ہریرہ رضی اللہ تعالیٰ عنہما سے روایت ہے کہ ان دونوں نے کہا کہ رسول اللہ صلی اللہ علیہ وسلم   نے فرمایا : اپنے مردوں کو لا الہ الا اللہ کی تلقین کرو۔ اس حدیث کے دو معنی ہو سکتے ہیں ایک تو یہ کہ جو مر رہا ہو اس کو کلمہ کی تلقین کرو ۔ دوسرے یہ کہ جو مر چکا ہو اس کو کلمہ سکھاؤ۔ پہلا معنی مجازی اور دوسرا معنی حقیقی ہے۔ اور بلا وجہ معنی مجازی مراد لینا ٹھیک نہیں ۔ لہذا حدیث کا مطلب یہ ہوا کہ اپنے مردوں کو کلمہ کی تلقین کرو اور کلمہ کی تلقین بعد از دفن ہی ہو سکتی ہے۔چنانچہ  فتاوی شامی میں ہے: أَمَّا عِنْدَ أَهْلِ السُّنَّةِ فَالْحَدِيثُ أَيْ «لَقِّنُوا مَوْتَاكُمْ لَا إلَهَ إلَّا الله » مَحْمُولٌ عَلَى حَقِيقَتِهِ لِأَنَّ الله تَعَالَى يُحْيِيهِ عَلَى مَا جَاءَتْ بِهِ الْآثَارُ وَقَدْ رُوِيَ عَنْهُ «أَنَّهُ أَمَرَ بِالتَّلْقِينِ بَعْدَ الدَّفْنِ فَيَقُولُ: يَا فُلَانَ بْنَ فُلَانٍ اُذْكُرْ دِينَك الَّذِي كُنْت عَلَيْهِ مِنْ شَهَادَةِ أَنْ لَا إلَهَ إلَّا الله  وَأَنَّ مُحَمَّدًا رَسُولُ الله (رد المحتار، ج 2، ص 191، باب الدفن، بحث تلقین بعد الميت) اہلِ سنت کے نزدیک یہ حدیث " لَقِّنُوا مَوْتَاكُمْ" اپنے حقیقی معنی پر محمول ہے، اس لیے کہ اللہ تعالیٰ اسے زندہ فرماتا ہے جیسا کہ حدیثوں میں آرہا ہے۔ اور حضور  صلی اللہ علیہ وسلم  سے روایت ہے کہ آپ نے دفن کے بعد تلقین کاحکم دیا پس قبر پر کہے اے  فلاں بن فلاں تو اس دین کو یا د رکھ جس پر تھا یعنی گواہی دینا اس بات کی کہ اللہ تعالیٰ کے  سوا کوئی معبود نہیں اور محمد صلی اللہ علیہ وسلم  اللہ کے رسول ہیں ۔ شامی میں اسی جگہ ہے:  وَإِنَّمَا لَا يُنْهَى عَنْ التَّلْقِينِ بَعْدَ الدَّفْنِ لِأَنَّهُ لَا ضَرَرَ فِيهِ بَلْ نَفْعٌ فَإِنَّ الْمَيِّتَ يَسْتَأْنِسُ بِالذِّكْرِ عَلَى مَا وَرَدَ فِي الْآثَارِ (رد المحتار، ج 2، ص 191، باب الدفن، بحث تلقین بعد الميت) دفن کے بعد تلقین سے منع نہیں  کرنا چاہیے۔ کیوں کہ اس میں کوئی ضرر نہیں بلکہ اس میں میت کا فائدہ ہے کہ وہ ذکر الہی سے انس حاصل کرتی ہے۔ جیسا کہ حدیثوں میں ہے۔ اس حدیث اور ان عبارات سے معلوم ہوا کہ دفن میت کے بعد اس کو کلمہ طیبہ سکھانا مستحب ہے، تا کہ مردہ نکیرین کے سوالات میں کامیاب ہو۔ اذان میں بھی کلمہ ہے بلکہ اذان میں پوری تلقین ہے کیوں کہ قبر میں  تین سوالات ہوتے ہیں "من ربك" تیرا رب کون ہے؟ "ما دينك" تیرا دین کیا ہے؟ "ما تقول في حق هذا الرجل"  ان سبز گنبد والے کے بارے میں کیا کہتا ہے؟ پہلے سوال کا جواب اشهد ان لا اله الا الله ، ہوا ۔ دوسرے سوال کا جواب "حی علی الصلوٰة " ہوا یعنی میرا دین وہ ہے جس میں پانچ نمازیں فرض ہیں ۔ (سوائے اسلام کے اور کسی دین میں پانچ نمازیں نہ تھیں ) ۔ تیسرے سوال کا جواب اشهد ان محمد رسول الله ہوا ۔ شامی میں ہے:  قَدْ يُسَنُّ الْأَذَانُ لِغَيْرِ الصَّلَاةِ كَمَا فِي آذَانِ الْمَوْلُودِ، وَالْمَهْمُومِ، وَالْمَصْرُوعِ، وَالْغَضْبَانِ وَمَنْ سَاءَ خُلُقُهُ مِنْ إنْسَانٍ، أَوْ بَهِيمَةٍ وَعِنْدَ مُزْدَحَمِ الْجَيْشِ وَعِنْدَ الْحَرِيقِ قِيلَ وَعِنْدَ إنْزَالِ الْمَيِّتِ لِقَبْرِهِ قِيَاسًا عَلَى أَوَّلِ خُرُوجِهِ لِلدُّنْيَا لَكِنْ رَده ابن حجر  فِي شَرْحِ الْعُبَابِ وَعِنْدَ تَغَوُّلِ الْغِيلَانِ أَيْ تَمَرُّدِ الْجِنِّ (رد المحتار، ج 1، ص 385، کتاب الصلاة، باب الاذان)  نماز کے سوا چند جگہ اذان دینا سنت ہے۔ بچہ  کے کان میں،  غمزدہ کے، مرگی والے کے ، غصہ والے کے کان میں ، جس جانور یا آدمی کی عادت خراب ہواس کے سامنے، لشکروں کے جنگ کے وقت، آگ لگ جانے کے وقت ، میت کو قبر میں اُتارتے وقت اس کے پیدا ہونے پر قیاس کرتے ہوئے۔ لیکن اس اذان کے سنت ہونے کا ابن حجر علیہ الرحمۃ نے انکار کیا ہے، جن کی سرکشی کے وقت ۔ علامہ ابن حجر نے اس اذان کے سنت ہونے کا انکار کیا نہ کہ مستحب و مباح ہونے کا ۔ حاصل تحریر یہ ہے کہ میت کی قبر پر اذان دینا مستحب ہے کیوں کہ اس سے میت کو نفع پہنچتا ہے۔ فقط

والله اعلم باالصواب و رسوله صلى الله عليه وسلم