نماز چھوڑنے والا شراب پینے والا پیر نہیں ہو سکتا

پیر کے لیے چار شرطیں ہیں  ^(۱)۔ ان میں ایک یہ بھی ہے کہ فاسقِ معلن نہ ہو۔ اور جب یہ شخص تارکِ صلاۃ اور شاربِ خمر (شراب پینے والا) ہے، تو ہرگز اسے پیر نہ بنایا جائے، اگرچہ اس سے خوارق (کرامات) ظہور میں آتے ہوں؛ اور نہ اس کے کہنے سے ممنوعات کا ارتکاب کیا جائے۔

”لا طاعة لمخلوق في معصية الخالق“ (یعنی: خالق کی نافرمانی میں مخلوق کی کوئی اطاعت نہیں)۔

اور اسے پیسہ بھی نہ دیا جائے، کیونکہ شراب خور ہے تو شراب میں ہی صرف کرے گا۔ اور اللہ عزوجل فرماتا ہے: ﴿وَتَعَاوَنُوْا عَلَى الْبِرِّ وَ التَّقْوٰى ۪-وَ لَا تَعَاوَنُوْا عَلَى الْاِثْمِ وَ الْعُدْوَانِ۪﴾^(۲) (القرآن، المائدۃ، الآیۃ: 2)واللہ تعالیٰ اعلم

(۱) ↩ اگر ان میں سے ایک شرط بھی کم ہو تو بیعت جائز نہیں۔ وہ چار شرائط یہ ہیں: (١) پیر سُنی صحیح العقیدہ ہو۔ (۲) فقہ کا اتنا علم رکھتا ہو کہ اپنی حاجت کے سب مسائل جانتا ہو، اور کوئی نئی حاجت درپیش ہو تو اس کا حکم کتاب سے نکال سکے۔ (٣) اس کا سلسلہ نبی اکرم صلی اللہ علیہ وسلم تک صحیح و متصل ہو۔ (۴) فاسقِ معلن نہ ہو، یعنی اعلانیہ کسی کبیرہ کا مرتکب یا کسی صغیرہ پر مُصر نہ ہو۔واللہ تعالیٰ اعلم۔ ( از: مفتی اٰلِ مصطفیٰ مصباحی  علیہ الرحمہ)

(۲) ↩ترجمہ کنزالایمان: اور نیکی اور پرہیزگاری پر ایک دوسرے کی مدد کرو اور گناہ اور زیادتی پر باہم مدد نہ دو۔